ডীপফেকৰ জাল: AIৰ প্ৰবঞ্চনাৰ পৰা নিজকে কেনেকৈ সুৰক্ষিত ৰাখিব

এই বছৰৰ সবাতোকৈ চৰ্চিত বিষয়টো হৈছে ‘AI’ আৰু এয়া খুবেই উপযুক্ত হয়। বৰ্তমানে প্ৰযুক্তিৰ পৰা মনোৰঞ্জনলৈকে, আমাৰ দৈনন্দিন কাৰ্যকলাপ আৰু উদ্ভাৱনত AIৰ ব্যৱহাৰ তীব্ৰভাৱে বৃদ্ধি পাইছে। সময় আগবাঢ়ি যোৱাৰ লগে লগে কৃত্ৰিম বুদ্ধিমত্তা (AI) অধিক উন্নত হৈ আছে আৰু জনসাধাৰণৰ বাবে এইটো অধিক সুলভ হৈ গৈ আছে। আনহাতে, একে সময়তে ইয়াৰ জৰিয়তে সৃষ্টি হোৱা বিপদসমূহো বৃদ্ধি পাই আছে। বৰ্তমানৰ ছ’চিয়েল মিডিয়াৰ জগতখন, চেলিব্ৰিটি আৰু নেতাসকলৰ AIৰ জৰিয়তে সৃষ্টি কৰা প্ৰায় আচল যেন লগা ফটো আৰু ভিডিঅ’ৰে ভৰি পৰিছে। এইবোৰ চাই আচল আৰু নকল ধৰা পেলোৱাটো খুবেই কঠিন হয়। এতিয়া প্ৰবঞ্চকবোৰে এই প্ৰযুক্তিৰ অপব্যৱহাৰ কৰি, ডীপফেকৰ জৰিয়তে মানুহৰ নকল কৰি নিজকে অন্য ব্যক্তি হিচাপে উপস্থাপন কৰি আছে।

ডীপফেক ইম্পাৰ্ছনেচন কি হয়?

যেতিয়া কোনো প্ৰবঞ্চকে AI প্ৰযুক্তিৰ জৰিয়তে নিজকে অন্য কোনো ব্যক্তি হিচাপে উপস্থাপন কৰে তেতিয়া ইয়াকে ডীপফেক ইম্পাৰ্ছনেচন বোলা হয়। ইয়াৰ লক্ষ্য আপোনাক ঠগি টকা-পইচা অথবা আপোনাৰ সংবেদনশীল তথ্য হস্তগত কৰা হয়। প্ৰবঞ্চকবোৰে আপোনাৰ বন্ধু অথবা পৰিয়ালৰ সদস্যৰ ভাও জুৰি অথবা কোম্পানী অথবা চৰকাৰী বিষয়াৰ ভাও জুৰি এয়া কৰিব পাৰে।

ডীপফেক শব্দটো “ডীপ লাৰ্নিং” আৰু “ফেক” এই দুটা শব্দৰ সংমিশ্ৰণৰ জৰিয়তে সৃষ্টি হৈছে। ইয়াক জেনেৰেটিভ এডভাৰ্ছাৰিয়েল নেটৱৰ্ক (GAN) নামৰ AI প্ৰযুক্তি ব্যৱহাৰ কৰি তৈয়াৰ কৰা হয়। এইটো প্ৰযুক্তিয়ে এজন ব্যক্তিৰ তথ্যসমূহ বুজি লৈ নকল অথচ সম্পূৰ্ণৰূপে আচল যেন লগা ভিজুৱেল তৈয়াৰ কৰে। ইয়াৰ জৰিয়তে প্ৰবঞ্চকবোৰে এনে অডিঅ’ অথবা ভিডিঅ’ মেছেজ তৈয়াৰ কৰি উলিয়ায় যিবোৰ আচল নে নকল ধৰা পেলোৱাটো প্ৰায় অসম্ভৱ হৈ পৰে।

ইম্পাৰ্ছনেচন কৰাৰ বাবে ডীপফেক কেনেদৰে ব্যৱহাৰ কৰা হয়

ডীপফেক প্ৰযুক্তিয়ে এজন ব্যক্তিৰ কণ্ঠস্বৰ আৰু তেওঁৰ মুখৰ গঠন অনুকৰণ কৰি সেইজন ব্যক্তিৰ এক সম্পূৰ্ণ আৰ্টিফিচিয়েল কপি তৈয়াৰ কৰে, যিটো অপৰাধীয়ে হানিকাৰক অথবা বেআইনী উদ্দেশ্যৰ বাবে ব্যৱহাৰ কৰে। নকল পৰিচয় গঢ়ি তোলাৰ বাবে এইবোৰ উপায়েৰে ডীপফেক ব্যৱহাৰ কৰা হয়:

• পৰিচয় চুৰি কৰা: ডীপফেক এনে কোনো অনলাইন সুৰক্ষা প্র’ট’কল আনলক কৰিবলৈ ব্যৱহাৰ কৰিব পাৰি, যি এজন ব্যক্তিৰ মুখ অথবা কণ্ঠস্বৰেৰে খোল খায়। ইয়াৰ জৰিয়তে অপৰাধীয়ে এজন ব্যক্তিৰ একাউণ্টত প্ৰৱেশ কৰিব পাৰে, তেওঁৰ নামত ঋণ ল’ব পাৰে অথবা অন্য কোনো ব্যক্তিৰ নামত ক্ৰেডিট কাৰ্ডো ল’ব পাৰে।
• বিত্তীয় জালিয়াতি: ডীপফেক ব্যৱহাৰ কৰি, অপৰাধীয়ে আপোনাৰ প্ৰিয়জনৰ ভাও জুৰি জনাব পাৰে যে হঠাতে ডাঙৰ বিপদ এটা হ’ল আৰু তেওঁক তৎক্ষণাৎ টকাৰ প্ৰয়োজন হৈছে। তাৰোপৰি, অপৰাধীয়ে কোনো কৰ্তৃপক্ষৰ বিষয়াৰ ভাও জুৰিও তৎক্ষণাৎ টকা ট্ৰেন্সফাৰ (ৱায়াৰ ট্ৰেন্সফাৰ) কৰিবলৈ দাবী কৰিব পাৰে। যিহেতু এইবোৰ নকল ভিডিঅ’ আৰু অডিঅ’ দেখা-শুনাত সম্পূৰ্ণৰূপে আচল যেন অনুভৱ হয়, সেয়ে লোকসকলে সহজেই এনে অপৰাধীৰ জালত পৰে।
• বলপূৰ্বক ধন দাবী আৰু ভয় দেখুৱাই ধন দাবী কৰা: অপৰাধীয়ে কোনো ব্যক্তিৰ নকল আপত্তিজনক ভিডিঅ’ অথবা ফটো তৈয়াৰ কৰিব পাৰে। তাৰ পাছত, সিহঁতে বলপূৰ্বক ধন দাবী কৰিবলৈ অথবা তেওঁলোকক নিজৰ ইচ্ছাৰ বিৰুদ্ধে কোনো কাম কৰিবলৈ বাধ্য কৰোৱাৰ বাবে সেইবোৰ ব্যৱহাৰ কৰিব পাৰে।
• মিছা তথ্য বিয়পোৱা: ডীপফেকৰ জৰিয়তে কোনো চেলিব্ৰিটি অথবা সাধাৰণ মানুহক এনে কথা কৈ থকা অথবা এনে কাম কৰি থকা বুলি দেখুৱাব পৰা যায় যিবোৰ তেওঁলোকে কেতিয়াও কোৱা অথবা কৰা নাই। ইয়াৰ লক্ষ্য কাৰোবাক বদনাম কৰা, সমাজত সংঘাতৰ সৃষ্টি কৰা অথবা শ্বেয়াৰ বজাৰক প্ৰভাৱিত কৰা হ’ব পাৰে।

ডীপফেক কেনেদৰে চিনি পাব পাৰি

যদিও ডীপফেক সম্পূৰ্ণৰূপে আচল যেনেই লাগে, তথাপি আপুনি কিছুমান গুৰুত্বপূৰ্ণ বস্তু চাই এইবোৰ ধৰা পেলাব পাৰে:

• ভিডিঅ’ত দেখা পোৱা ত্ৰুটিসমূহ: আচহুৱা গতিবিধিসমূহ লক্ষ্য কৰক, যেনে অদ্ভুতভাৱে চকু টিপিওৱা অথবা মুখৰ অভিব্যক্তি অস্বাভাৱিক হোৱা। এয়াও পৰীক্ষা কৰিব যে ব্যক্তিজনৰ মুখত পৰা পোহৰ আৰু ছাঁ, তেওঁৰ চৌপাশৰ পৰিৱেশৰ সৈতে খাপ খাইছে নে নাই।
• অডিঅ’ৰ পৰা ধৰা পেলোৱা: কণ্ঠস্বৰৰ প্ৰতি মনোযোগ দিয়ক। কণ্ঠস্বৰ সম্পূৰ্ণ নিৰ্বিকাৰ, ৰব’টৰ দৰে লাগিব পাৰে অথবা ইয়াত অস্বাভাৱিক বিৰতি থাকিব পাৰে। লগতে এয়াও হ’ব পাৰে যে ইয়াৰ অডিঅ’টো ভিডিঅ’ৰ সৈতে খাপ খোৱা নাই আৰু কৈ থকা শব্দবোৰ ব্যক্তিজনৰ ওঁঠৰ গতিবিধিৰ সৈতে খাপ খোৱা নাই।
• সন্দেহজনক অনুৰোধ কৰা: যদি কোনোবাই হঠাতে আপোনাৰ পৰা টকা-পইচা অথবা আপোনাৰ কোনো ব্যক্তিগত তথ্য বিচাৰে তেন্তে অত্যন্ত সতৰ্ক হওক। প্ৰবঞ্চকবোৰে প্ৰায়েই আপোনাক এয়া অনুভৱ কৰাবলৈ চেষ্টা কৰে যে কামটো খুবেই জৰুৰী হয় আৰু তৎক্ষণাৎ কৰিব লাগিব, যাতে আপুনি চাপগ্ৰস্ত হৈ দ্ৰুতভাৱে কোনো পদক্ষেপ গ্ৰহণ কৰে।

ডীপফেকৰ পৰা কেনেকৈ সুৰক্ষিত থাকিব পাৰিব

ডীপফেক প্ৰযুক্তিৰ হানিকাৰক বিপদবোৰ একেৰাহে বৃদ্ধি পাই আছে কিন্তু তথাপি আপুনি নিজকে সুৰক্ষিত কৰিবলৈ কেইবাটাও পদক্ষেপ গ্ৰহণ কৰিব পাৰে।

• মাল্টি-ফেক্টৰ অথেণ্টিকেচন (MFA) ব্যৱহাৰ কৰক: আপোনাৰ একাউণ্টত সদায়েই MFA সক্ষম কৰি ৰাখক। এইটোৱে সুৰক্ষাৰ কেইবাটাও তৰপ যোগ দিয়ে। ইয়াৰ ফলত, যদি কোনো প্ৰৱঞ্চকে বায়’মেট্ৰিক স্কেন অতিক্ৰম কৰি আগবাঢ়িও যায়, তথাপি তাক আপোনাৰ একাউণ্টত প্ৰৱেশ কৰিবলৈ অন্য ধৰণৰ সত্যাপনৰ প্ৰয়োজন হ’ব।
• সন্দেহজনক যেন লগা অনুৰোধবোৰ সত্যাপন কৰক: যদি কোনো বন্ধু অথবা সহকৰ্মীয়ে ভিডিঅ’ কল অথবা মেছেজৰ জৰিয়তে ধন পঠিয়াবলৈ অথবা তথ্য জনাবলৈ অনুৰোধ কৰে, তেন্তে তৎক্ষণাৎ কলটো কাটি দিয়ক আৰু অন্য কোনো বিশ্বাসযোগ্য মাধ্যমৰ জৰিয়তে তেওঁলোকৰ সৈতে যোগাযোগ কৰক। ইয়াৰ বাবে আপুনি তেওঁলোকৰ নিজৰ ফ’ন নম্বৰত তেওঁলোকক ফ’ন কৰিব পাৰে।
• নিজেও শিকক আৰু আনকো শিকাওক: ডীপফেকক ধৰা পেলোৱাৰ উপায়বোৰ শিকক আৰু এইবোৰ কথা নিজৰ পৰিয়াল আৰু সহকৰ্মীসকলকো শিকাওক। সদায়েই “বিশ্বাস কৰক, কিন্তু সত্যাপন কৰক” নীতি পালন কৰিবলৈ চেষ্টা কৰক। এনে ধৰণৰ প্ৰৱঞ্চনাৰ পৰা নিজকে ৰক্ষা কৰিবলৈ এয়াই সৰ্বোত্তম উপায় হয়।

কেনেকৈ অভিযোগ জনাব

যদি আপুনি ভাবে যে আপুনি কোনো প্ৰৱঞ্চনাৰ বলি হৈছে তেন্তে তৎক্ষণাৎ ইয়াৰ বিষয়ে অভিযোগ কৰক:

PhonePeত অভিযোগ কৰা:

• PhonePe এপ: সহায় শাখালৈ গৈ অভিযোগ কৰক।
• PhonePe গ্ৰাহক সেৱা: 80-68727374 / 022-68727374 নম্বৰত কল কৰক।
• ছ’চিয়েল মিডিয়াত অভিযোগ কৰা:
  • Twitter: PhonePe Support
  • Facebook: PhonePe Official
• অভিযোগ নিষ্পত্তি:  PhonePe অভিযোগ প’ৰ্টেলত অভিযোগ পঞ্জীয়ন কৰক।

সংশ্লিষ্ট কৰ্তৃপক্ষৰ ওচৰত অভিযোগ কৰক:

• চাইবাৰ ক্ৰাইম চেল:  চাইবাৰ ক্ৰাইম প’র্টেলত অনলাইনযোগে অভিযোগ কৰক অথবা 1930 নম্বৰত কল কৰক।
• দূৰসংযোগ বিভাগ (DOT):  সঞ্চাৰ সাথী প’র্টেলত চক্ষু সুবিধাৰ জৰিয়তে সন্দেহজনক মেছেজ, কল অথবা হোৱাটছএপত হোৱা প্ৰৱঞ্চনাৰ বিষয়ে অভিযোগ কৰক।

মনত ৰাখিবলগীয়া গুৰুত্বপূৰ্ণ কথা — PhonePeই কেতিয়াও গোপনীয় অথবা ব্যক্তিগত বিৱৰণ জানিবলৈ নিবিচাৰে। PhonePeৰ পৰা পঠিওৱা বুলি দাবী কৰা সকলোবোৰ ইমেইল আওকাণ কৰক যদিহে সেইবোৰ phonepe.com ডমেইনৰ পৰা অহা নাই। যদি আপুনি প্ৰৱঞ্চনা হোৱা বুলি সন্দেহ কৰে, তেন্তে অনুগ্ৰহ কৰি তৎক্ষণাত সম্পৰ্কিত কৰ্তৃপক্ষৰ সৈতে যোগাযোগ কৰক।