Back
Trust & Safety
বীমা জালিয়াতিৰ বিষয়ে বুজি পোৱা: ইয়াৰ পৰা কেনেকৈ সুৰক্ষিত থাকিব
আপুনি শেষবাৰৰ বাবে স্বাস্থ্য, জীৱন, গাড়ী অথবা বাইকৰ বীমা পলিচি কিনা অথবা নবীকৰণ কৰা সময়ছোৱাৰ বিষয়ে চিন্তা কৰকচোন। ইয়াৰ উদ্দেশ্য কি আছিল? এই ক্ৰয়ৰ উদ্দেশ্য আছিল অপ্ৰত্যাশিত আৰ্থিক লোকচানৰ ক্ষেত্ৰত আপুনি যাতে এক সুৰক্ষা নেট লাভ কৰাটো সুনিশ্চিত কৰিব পাৰে। কিন্তু এই সুৰক্ষা নেটেই যদি আপুনি কঠোৰ পৰিশ্ৰম কৰি উপাৰ্জন কৰা ধন লুট কৰিবলৈ বিচৰা প্ৰৱঞ্চকৰ বাবে এটা সুবিধাজনক উপায় হৈ পৰে তেন্তে কি হ’ব?
বীমা জালিয়াতি হৈছে এক ক্ৰমবৰ্ধিত চিন্তাজনক বিষয় যিয়ে কেৱল বীমা কোম্পানীৰে নহয় বৰং পলিচি ধাৰকৰো গুৰুতৰ ক্ষতিসাধন কৰে! ভুল বীমা দাবী আৰু বীমা জালিয়াতি প্ৰতিৰোধৰ বাবে বীমা কোম্পানীসমূহৰ নিজা প্র’ট’কল থকাৰ দৰেই, আপুনি ইয়াৰ হানিকাৰক দিশটো বুজি পোৱাটোও গুৰুত্বপূৰ্ণ হয় যাৰ ফলত অত্যন্ত সাৱধান নহ’লে আপোনালোকৰ দৰে পলিচি ধাৰকসকল গুৰুতৰ বিত্তীয় ক্ষতিৰ সন্মুখীন হ’ব পাৰে।
এইটো ব্লগত বীমা জালিয়াতিৰ সচৰাচৰ প্ৰকাৰ, সেইবোৰৰ ফলাফল তথা সেইবোৰৰ পৰা নিজকে সুৰক্ষিত কৰাৰ ব্যৱহাৰিক পদক্ষেপসমূহৰ ৰূপৰেখা প্ৰদান কৰা হৈছে।
বীমা জালিয়াতি কি হয়?
বীমা জালিয়াতি হৈছে এক প্ৰৱঞ্চনামূলক কাৰ্য। ইয়াত প্ৰৱঞ্চকবোৰে প্ৰতাৰণা অথবা ভুল প্ৰতিনিধিত্বৰ জৰিয়তে ভুক্তভোগীক ঠগি অবৈধভাৱে ধন সংগ্ৰহ কৰিবলৈ চেষ্টা কৰে। ইয়াৰ বাবে সিহঁতে কম প্ৰিমিয়াম অথবা সীমিত সময়ৰ বাবে উপলব্ধ ৰেহাইৰ লোভ দেখুৱাই যিবোৰ বেছিভাগ সময়তে ভুৱা হয়।
বীমা জালিয়াতিৰ কিছুমান পৰিস্থিতি এনেধৰণৰ হয়
পৰিস্থিতি 1. ভুৱা অফাৰ: ইয়াত প্ৰৱঞ্চকবোৰে ভুক্তভোগীৰ সৈতে যোগাযোগ কৰে তথা বাস্তৱিকতে সম্ভৱ নোহোৱা কম প্ৰিমিয়াম অথবা বিশেষ ডিল পোৱাৰ সুযোগৰ বিষয়ে জনাই তেওঁলোকক প্ৰলোভিত কৰে আৰু ইয়াৰ জৰিয়তে তেওঁলোকক ব্যক্তিগত অথবা বেংকিং তথ্য শ্বেয়াৰ কৰিবলৈ উদগনি দিয়ে।
ৰাম্যালৈ এটা ফ’ন আহে য‘ত দাবী কৰা হয় যে যদি তেওঁ তৎক্ষণাত নিজৰ গাড়ীৰ বীমা পলিচি নৱীকৰণ নকৰে তেন্তে তেওঁৰ গাড়ীৰ বীমা পলিচি লেপছ হৈ যাব। তেওঁক লগতে এটা শেষ মুহূৰ্তৰ ৰেহাইও প্ৰদান কৰা হয় যাৰ ম্যাদ হৈছে এঘণ্টা। এই চাপৰ সন্মুখীন হৈ, তেওঁ নিজৰ পলিচিৰ নৱীকৰণ কৰিবলৈ নিজৰ ক্ৰেডিট কাৰ্ডৰ বিৱৰণ শ্বেয়াৰ কৰে। দুৰ্ভাগ্যবশতঃ, পাছত তেওঁ জানিবলৈ পায় যে এই জালিয়াতিৰ দ্বাৰা তেওঁৰ একাউণ্টৰ পৰা বৃহৎ পৰিমাণৰ ধনৰাশি উলিয়াই লোৱা হৈছিল।
পৰিস্থিতি 2. ভুৱা বীমা ৱেবছাইট: চাইবাৰ অপৰাধীবোৰে ব্যক্তিগত তথ্য, বেংকিং বিৱৰণ আদি চুৰি কৰা অথবা অস্তিত্বহীন পলিচিৰ বাবে পৰিশোধ লোৱাৰ লক্ষ্যৰে প্ৰকৃত বীমা প’ৰ্টেলৰ দৰে সাইলাখ একে ৱেবছাইট তৈয়াৰ কৰে।
প্ৰৱালে নিজকে তথা নিজৰ পৰিয়ালক কভাৰ কৰাৰ বাবে এটা স্বাস্থ্য বীমা পলিচি বিচাৰি আছে। তেওঁ অনলাইনলৈ যায় আৰু “সৰ্বশ্ৰেষ্ঠ স্বাস্থ্য বীমা” ছাৰ্চ কৰে। ইয়াৰ ফলাফল চাই তেওঁ এনে এটা ৱেবছাইটলৈ যায় যিটো এটা সুপৰিচিত বীমা কোম্পানীৰ ৱেবছাইট যেন লাগে। সিমান মনোযোগ নিদিয়াকৈ চোৱাৰ বাবে তেওঁ বীমা কোম্পানীটোৰ পুৰণি ল’গ’ আৰু ইয়াৰ নামৰ ভুল বানান আদি লক্ষ্য নকৰিলে। বিতং বিৱৰণৰ প্ৰতি গুৰুত্ব নিদিয়াকৈ, তেওঁ নিজৰ ব্যক্তিগত বিৱৰণ, বেংকিং তথ্য ইয়াত জমা দিয়ে আৰু এটা পলিচিৰ বাবে অনলাইনযোগে ধন পৰিশোধ কৰে। পাছত, যেতিয়া তেওঁ বীমা কোম্পানীৰ সৈতে যোগাযোগ কৰিবলৈ চেষ্টা কৰে, তেতিয়াহে তেওঁ গম পায় যে সেই ৱেবছাইটটো ভুৱা আছিল আৰু তেওঁৰ ধন আৰু ব্যক্তিগত তথ্য চাইবাৰ অপৰাধীয়ে চুৰি কৰিছে।
পৰিস্থিতি 3. ফিশ্বিং ইমেইল: ফিশ্বিং ইমেইল এটা সাধাৰণ প্ৰৱঞ্চনা পদ্ধতি হয়। এই পদ্ধতিত প্ৰৱঞ্চকবোৰে প্ৰতাৰণামূলক মেছেজ পঠিয়ায় তথা ক্ষতিকাৰক লিংক অথবা এটাচ্চমেণ্টৰ জৰিয়তে সংবেদনশীল তথ্য চুৰি কৰিবলৈ অথবা মেলৱেৰ ইনষ্টল কৰিবলৈ চেষ্টা কৰে।
সুশান্তই এটা ইমেইল পায় যিটো তেওঁৰ বীমা কোম্পানীৰ পৰা অহা যেন লাগে। ইয়াত দাবী কৰা হয় যে তেওঁ তৎক্ষণাত নিজৰ একাউণ্টৰ বিৱৰণ সত্যাপন নকৰিলে তেওঁৰ পলিচিখন বাতিল কৰা হ’ব। এইটো ইমেইলত এটা ৱেবছাইটৰ লিংক দিয়া হৈছিল যিটো বীমা কোম্পানীৰ অফিচিয়েল প’ৰ্টেল হয় যেন লাগিছিল। এইটো ইমেইলৰ ওপৰত বিশ্বাস কৰি আৰু প্ৰৱঞ্চকে সৃষ্টি কৰা জৰুৰীকালীন অৱস্থাৰ বাবে চাপগ্ৰস্ত হৈ তেওঁ অধিক চিন্তা-চৰ্চা নকৰাকৈ লিংকটোত ক্লিক কৰে আৰু নিজৰ ল’গইন ক্ৰিডেনছিয়েল পূৰণ কৰে। পাছত, তেওঁ নিজৰ বেংক একাউণ্টত অনধিকৃত লেনদেন সম্পন্ন হৈছে বুলি জানিবলৈ পায়। ভুৱা ৱেবছাইটটো বিশেষভাৱে তেওঁৰ সংবেদনশীল তথ্য চুৰি কৰিবলৈ ডিজাইন কৰাৰ বাবে এয়া সম্ভৱ হৈছিল।
পৰিস্থিতি 4. UPI আৰু & ডিজিটেল পৰিশোধ প্ৰৱঞ্চনা: এই প্ৰৱঞ্চনাত প্ৰৱঞ্চকবোৰে নিজৰ ব্যক্তিগত UPI লিংক অথবা QR ক’ড শ্বেয়াৰ কৰি সেইবোৰ বৈধ বীমা পৰিশোধৰ লিংক বুলি দাবী কৰে। সিহঁতে ভুক্তভোগীসকলক ঠগি নিজৰ ব্যক্তিগত একাউণ্টলৈ ধন ট্ৰেন্সফাৰ কৰিবলৈ পতিয়ন নিয়ায়, যাৰ ফলত বীমাৰ ধন পৰিশোধ অথবা ৰেহাই হিচাপে ধনৰ অনধিকৃত ট্ৰেন্সফাৰ সম্পন্ন হয়।
সুচেতালৈ বীমা এজেণ্ট বুলি দাবী কৰা এজন ব্যক্তিৰ পৰা ফ’ন আহে। ব্যক্তিজনে কয় যে সুচেতাৰ পলিচি নৱীকৰণৰ বাবে সীমিত সময়ৰ ৰেহাই প্ৰদান কৰা হৈছে। প্ৰৱঞ্চকটোৱে তেওঁলৈ এটা UPI লিংক পঠিয়ায়। সি কয় যে সুচেতাই ৰেহাই লাভ কৰাটো সুনিশ্চিত কৰিবলৈ এই ধন পৰিশোধ সম্পূৰ্ণ কৰিব লাগিব। প্ৰৱঞ্চকটোক প্ৰকৃত বীমা এজেণ্ট বুলি বিশ্বাস কৰি সুচেতাই লিংকটোত ক্লিক কৰে আৰু নিজৰ UPI PIN লিখে। পাছতহে তেওঁ জানিবলৈ পায় যে তেওঁৰ বেংক একাউণ্টৰ পৰা ধন কৰ্তন কৰা হৈছে আৰু এই লেনদেনৰ ধন বীমা কোম্পানীৰ ওচৰলৈ যোৱাৰ কোনো ৰেকৰ্ড নাই।
বীমা জালিয়াতিৰ সাধাৰণ সংকেত চিহ্নসমূহ
- অবাস্তৱ অফাৰসমূহ, যেনে খুবেই কম প্ৰিমিয়াম অথবা বহু বেছি সুবিধা।
- “সীমিত সময়ৰ অফাৰ” অথবা পলিচি লেপছ হোৱাৰ ভাবুকিৰ দৰে অত্যন্ত চাপ দিয়া কৌশলসমূহ।
- UPI অথবা ব্যক্তিগত একাউণ্টৰ দৰে অনানুষ্ঠানিক পদ্ধতিৰ জৰিয়তে ধন পৰিশোধ কৰিবলৈ অনুৰোধ কৰা।
- উপযুক্ত সুৰক্ষা (যেনে, HTTPS নথকা) অথবা যোগাযোগৰ বিৱৰণ নথকা ৱেবছাইট।
- OTP, UPI PIN অথবা একাউণ্টৰ বিৱৰণৰ দৰে সংবেদনশীল তথ্য জনাবলৈ অনুৰোধ কৰা।
- ব্যক্তিগত অথবা বিত্তীয় তথ্য বিচাৰি অনুৰোধ জনোৱা অযাচিত কল, ইমেইল অথবা মেছেজ।
বীমা জালিয়াতিৰ পৰা নিজকে কেনেকৈ সুৰক্ষিত কৰিব
- বীমা কোম্পানীটোৰ সবিশেষ তথ্য চাওক: বীমা কোম্পানীটোৰ ইতিহাস, বিত্তীয় স্থিতি, অনুজ্ঞাপত্ৰ আৰু গ্ৰাহকৰ ৰিভিউসমূহ সত্যাপন কৰক।
- নগদ ধন পৰিশোধ কৰাটো পৰিহাৰ কৰক: নথিভুক্ত লেনদেন সুনিশ্চিত কৰিবলৈ অনলাইন প’ৰ্টেল পৰিশোধ অথবা কাৰ্ড পৰিশোধৰ দৰে সুৰক্ষিত পৰিশোধ পদ্ধতি ব্যৱহাৰ কৰক।
- সংবেদনশীল তথ্য সুৰক্ষিতভাৱে ৰাখক: ব্যক্তিগত তথ্য কেৱল বিশ্বাসযোগ্য উৎস আৰু সুৰক্ষিত চেনেলৰ সৈতেহে শ্বেয়াৰ কৰিব।
- পলিচিৰ বিৱৰণ পঢ়ক: পলিচিৰ বৈধতা সুনিশ্চিত কৰিবলৈ পলিচিৰ নথিপত্ৰৰ চৰ্তসমূহ সাৱধানেৰে পৰ্যালোচনা কৰক।
যদি আপুনি বীমা জালিয়াতিৰ বলি হয় তেন্তে কি কৰিব
যদি আপুনি জালিয়াতিৰ সন্দেহ কৰে অথবা আপোনাক প্ৰৱঞ্চনা কৰা হৈছে, তেন্তে তৎক্ষণাত পদক্ষেপ গ্ৰহণ কৰক:
- ঘটনাটোৰ বিষয়ে অভিযোগ কৰক:
- PhonePe এপ: সহায় শাখালৈ গৈ অভিযোগ কৰক।
- গ্ৰাহক সেৱা: PhonePe লৈ 80–68727374 অথবা 022–68727374 নম্বৰত কল কৰক।
- ছ’চিয়েল মিডিয়া: অফিচিয়েল PhonePe একাউণ্টত ঘটনাটোৰ বিষয়ে অভিযোগ কৰক:
- Twitter: PhonePe Support
- Facebook: PhonePe Facebook
- অভিযোগ নিষ্পত্তি: আপোনাৰ টিকট আইডিৰ সৈতে PhonePeৰ অভিযোগ প’ৰ্টেল ব্যৱহাৰ কৰক: অভিযোগ প’ৰ্টেল
- সংশ্লিষ্ট কৰ্তৃপক্ষৰ ওচৰত অভিযোগ কৰক:
- চাইবাৰ ক্ৰাইম চেল: চাইবাৰ ক্ৰাইম প’র্টেলত অভিযোগ কৰক অথবা 1930 নম্বৰত কল কৰক।
- IRDAI: তলত দিয়া লিংকৰ জৰিয়তে ভাৰতীয় বীমা নিয়ামক আৰু উন্নয়ন কৰ্তৃপক্ষৰ ওচৰত জালিয়াতিৰ অভিযোগ দাখিল কৰক – IRDAI আমাৰ সৈতে যোগাযোগ কৰক।
মনত ৰাখিবলগীয়া গুৰুত্বপূৰ্ণ কথা — PhonePeই কেতিয়াও গোপনীয় অথবা ব্যক্তিগত বিৱৰণ জানিবলৈ নিবিচাৰে। PhonePeৰ পৰা প্ৰেৰণ কৰা বুলি দাবী কৰা সকলোবোৰ মেইল আওকাণ কৰক যদিহে সেইবোৰ phonepe.com ডমেইনৰ পৰা অহা নাই। যদি আপুনি প্ৰৱঞ্চনা হোৱা বুলি সন্দেহ কৰে, তেন্তে অনুগ্ৰহ কৰি তৎক্ষণাত সম্পৰ্কিত কৰ্তৃপক্ষৰ সৈতে যোগাযোগ কৰক।
