Back
Trust & Safety
ವಿಮೆ ವಂಚನೆಗಳ ಬಗ್ಗೆ ತಿಳಿಯಿರಿ: ಸುರಕ್ಷಿತವಾಗಿರುವುದು ಹೇಗೆ
ನೀವು ಕೊನೆಯ ಬಾರಿ ವಿಮೆ ಮಾಡಿಸಿದ ಅಥವಾ ನವೀಕರಿಸಿದ ಸಮಯವನ್ನು ಸ್ವಲ್ಪ ನೆನಪಿಸಿಕೊಳ್ಳಿ. ಅದು ಆರೋಗ್ಯ, ಜೀವನ, ಕಾರು ಅಥವಾ ಬೈಕ್ ವಿಮೆ ಆಗಿರಬಹುದು. ಕಷ್ಟದ ಸಮಯದಲ್ಲಿ ಆರ್ಥಿಕ ನೆರವು ಸಿಗಲಿ ಎನ್ನುವುದು ಇದರ ಹಿಂದಿನ ಉದ್ದೇಶವಾಗಿರುತ್ತದೆ. ಆದರೆ, ಮೋಸಗಾರರು ಇದನ್ನೇ ಬಳಸಿಕೊಂಡು ನಿಮ್ಮ ಕಷ್ಟಪಟ್ಟು ದುಡಿದ ಹಣವನ್ನು ಕದಿಯಲು ನೋಡಿದರೆ ಏನಾಗುತ್ತದೆ?
ವಿಮೆ ವಂಚನೆಯ ಸಮಸ್ಯೆ ಇಂದು ಹೆಚ್ಚುತ್ತಿದೆ. ಇದು ಕೇವಲ ವಿಮೆ ಕಂಪನಿಗಳಿಗೆ ಮಾತ್ರವಲ್ಲ, ಪಾಲಿಸಿದಾರರಿಗೂ ತೊಂದರೆ ನೀಡುತ್ತದೆ. ತಪ್ಪು ಕ್ಲೇಮ್‌ಗಳನ್ನು ಮತ್ತು ವಿಮಾ ವಂಚನೆಯನ್ನು ತಡೆಯಲು ವಿಮೆ ಕಂಪನಿಗಳು ಹೇಗೆ ನಿಯಮಗಳನ್ನು ಇಟ್ಟುಕೊಂಡಿರುತ್ತವೆಯೋ, ಅದೇ ರೀತಿ ನೀವು ಕೂಡ ಎಚ್ಚರದಿಂದ ಇರಬೇಕು. ಇಲ್ಲದಿದ್ದರೆ, ಗ್ರಾಹಕರಾದ ನೀವೇ ದೊಡ್ಡ ಆರ್ಥಿಕ ನಷ್ಟವನ್ನು ಅನುಭವಿಸಬೇಕಾಗುತ್ತದೆ.
ಈ ಬ್ಲಾಗ್‌ನಲ್ಲಿ ಸಾಮಾನ್ಯವಾದ ವಿಮೆ ವಂಚನೆಗಳು, ಅವುಗಳ ಪರಿಣಾಮಗಳು ಮತ್ತು ಅವುಗಳಿಂದ ನಿಮ್ಮನ್ನು ನೀವು ಹೇಗೆ ರಕ್ಷಿಸಿಕೊಳ್ಳಬಹುದು ಎನ್ನುವುದನ್ನು ಸರಳವಾಗಿ ವಿವರಿಸಲಾಗಿದೆ.
ವಿಮೆ ವಂಚನೆ ಎಂದರೇನು?
ಕಡಿಮೆ ಪ್ರೀಮಿಯಂ ಅಥವಾ ಸೀಮಿತ ಅವಧಿಯ ವಿಶೇಷ ರಿಯಾಯಿತಿಗಳ ಹೆಸರಿನಲ್ಲಿ, ಮೋಸಗಾರರು ಸುಳ್ಳು ಹೇಳಿ ಜನರಿಂದ ಹಣವನ್ನು ಕದಿಯುವುದೇ ವಿಮೆ ವಂಚನೆ. ಹೆಚ್ಚಾಗಿ ಈ ಆಫರ್‌ಗಳು ನಕಲಿಯಾಗಿರುತ್ತವೆ.
ವಿಮೆ ವಂಚನೆಯ ಉದಾಹರಣೆಗಳು
ಸನ್ನಿವೇಶ 1. ನಕಲಿ ಆಫರ್‌ಗಳು: ಮೋಸಗಾರರು ಜನರನ್ನು ಸಂಪರ್ಕಿಸಿ, ನಂಬಲಾಗದಷ್ಟು ಕಡಿಮೆ ಪ್ರೀಮಿಯಂ ಅಥವಾ ವಿಶೇಷ ಡೀಲ್‌ಗಳನ್ನು ನೀಡುತ್ತೇವೆ ಎಂದು ಹೇಳುತ್ತಾರೆ. ಹೀಗೆ ಹೇಳಿ, ನಂಬಿಸಿ ಅವರ ವೈಯಕ್ತಿಕ ಅಥವಾ ಬ್ಯಾಂಕ್ ಮಾಹಿತಿಯನ್ನು ಪಡೆಯುತ್ತಾರೆ.
ರಮ್ಯಾ ಅವರಿಗೆ ಒಂದು ಕರೆ ಬರುತ್ತದೆ. “ನೀವು ಈಗಲೇ ವಿಮೆ ನವೀಕರಿಸದಿದ್ದರೆ (ರಿನೀವಲ್ ಮಾಡದಿದ್ದರೆ) ನಿಮ್ಮ ಕಾರು ವಿಮೆ ಪಾಲಿಸಿ ರದ್ದಾಗುತ್ತದೆ” ಎಂದು ಅವರು ಹೇಳುತ್ತಾರೆ. ಅಷ್ಟೇ ಅಲ್ಲ, “ಈಗಲೇ ಹಣ ಕಟ್ಟಿದರೆ ಡಿಸ್ಕೌಂಟ್ ಸಿಗುತ್ತದೆ, ಇನ್ನೊಂದು ಗಂಟೆಯಲ್ಲಿ ಈ ಆಫರ್ ಮುಗಿಯುತ್ತದೆ” ಎಂದು ಒತ್ತಡ ಹಾಕುತ್ತಾರೆ. ಗಾಬರಿಯಾದ ರಮ್ಯಾ ತಮ್ಮ ಕ್ರೆಡಿಟ್ ಕಾರ್ಡ್ ವಿವರಗಳನ್ನು ನೀಡುತ್ತಾರೆ. ನಂತರ ನೋಡಿದರೆ, ಅವರ ಖಾತೆಯಿಂದ ದೊಡ್ಡ ಮೊತ್ತದ ಹಣ ಕಳ್ಳತನವಾಗಿರುತ್ತದೆ.
ಸನ್ನಿವೇಶ 2. ನಕಲಿ ವಿಮೆ ವೆಬ್‌ಸೈಟ್‌ಗಳು: ಸೈಬರ್ ಅಪರಾಧಿಗಳು ಅಸಲಿ ವಿಮೆ ಕಂಪನಿಗಳಂತೆಯೇ ಕಾಣುವ ನಕಲಿ ವೆಬ್‌ಸೈಟ್‌ಗಳನ್ನು ಸೃಷ್ಟಿಸುತ್ತಾರೆ. ಇವುಗಳ ಮೂಲಕ ಜನರ ಮಾಹಿತಿ, ಬ್ಯಾಂಕ್ ವಿವರಗಳು ಅಥವಾ ಹಣವನ್ನು ಕದಿಯುತ್ತಾರೆ.
ಪ್ರವಲ್ ಅವರಿಗೆ ತಮ್ಮ ಕುಟುಂಬಕ್ಕಾಗಿ ಆರೋಗ್ಯ ವಿಮೆ ಬೇಕಾಗಿರುತ್ತದೆ. ಅವರು ಇಂಟರ್ನೆಟ್‌ನಲ್ಲಿ “ಅತ್ಯುತ್ತಮ ಆರೋಗ್ಯ ವಿಮೆ” ಎಂದು ಹುಡುಕುವಾಗ, ಪ್ರಸಿದ್ಧ ಕಂಪನಿಯಂತೆಯೇ ಕಾಣುವ ಒಂದು ವೆಬ್‌ಸೈಟ್ ಸಿಗುತ್ತದೆ. ಆದರೆ ಅಲ್ಲಿ ಕಂಪನಿಯ ಲೋಗೋ ಹಳೆಯದಾಗಿರುತ್ತದೆ ಮತ್ತು ಹೆಸರು ತಪ್ಪಾಗಿರುತ್ತದೆ ಎನ್ನುವುದನ್ನು ಅವರು ಗಮನಿಸುವುದಿಲ್ಲ. ವಿವರಗಳನ್ನು ನೋಡದೆಯೇ, ಅವರು ತಮ್ಮ ಮಾಹಿತಿ ಮತ್ತು ಹಣವನ್ನು ಆನ್‌ಲೈನ್ ಮೂಲಕ ಪಾವತಿಸುತ್ತಾರೆ. ನಂತರ ಕಂಪನಿಯನ್ನು ಸಂಪರ್ಕಿಸಿದಾಗ, ಆ ವೆಬ್‌ಸೈಟ್ ನಕಲಿ ಎನ್ನುವುದು ತಿಳಿಯುತ್ತದೆ ಮತ್ತು ಅವರ ಹಣ ಹಾಗೂ ಮಾಹಿತಿ ಕಳ್ಳತನವಾಗಿರುತ್ತದೆ.
ಸನ್ನಿವೇಶ 3. ಫಿಶಿಂಗ್ ಇಮೇಲ್‌ಗಳು: ಇದು ಇಮೇಲ್ ಮೂಲಕ ನಡೆಯುವ ಮೋಸ. ವಂಚಕರು ಸುಳ್ಳು ಸಂದೇಶಗಳನ್ನು ಕಳುಹಿಸಿ, ನಕಲಿ ಲಿಂಕ್‌ಗಳ ಮೂಲಕ ಜನರ ಸೂಕ್ಷ್ಮ ಮಾಹಿತಿ ಕದಿಯುತ್ತಾರೆ ಅಥವಾ ಮೊಬೈಲ್/ಕಂಪ್ಯೂಟರ್‌ಗೆ ವೈರಸ್ ಹಾಕುತ್ತಾರೆ.
ಸುಶಾಂತ್ ಅವರಿಗೆ ವಿಮೆ ಕಂಪನಿಯಿಂದ ಬಂದಂತೆ ಕಾಣುವ ಒಂದು ಇಮೇಲ್ ಬರುತ್ತದೆ. “ನಿಮ್ಮ ಖಾತೆಯನ್ನು ಈಗಲೇ ಪರಿಶೀಲಿಸದಿದ್ದರೆ ಪಾಲಿಸಿ ರದ್ದಾಗುತ್ತದೆ” ಎಂದು ಅದರಲ್ಲಿ ಬರೆದಿರುತ್ತದೆ. ಆ ಇಮೇಲ್‌ನಲ್ಲಿ ಕಂಪನಿಯ ವೆಬ್‌ಸೈಟ್‌ನಂತೆಯೇ ಕಾಣುವ ಒಂದು ಲಿಂಕ್ ಕೂಡ ಇರುತ್ತದೆ. ಸುಶಾಂತ್ ಅದನ್ನು ನಂಬಿ ಮತ್ತು ಸೃಷ್ಟಿಸಲಾದ ತುರ್ತು ಪರಿಸ್ಥಿತಿಗೆ ಮಣಿದು, ಲಿಂಕ್ ಕ್ಲಿಕ್ ಮಾಡಿ ತಮ್ಮ ಲಾಗಿನ್ ವಿವರಗಳನ್ನು ಹಾಕುತ್ತಾರೆ. ನಂತರ ಅವರ ಬ್ಯಾಂಕ್ ಖಾತೆಯಿಂದ ಹಣ ಕಳ್ಳತನವಾಗಿರುತ್ತದೆ. ಆ ನಕಲಿ ವೆಬ್‌ಸೈಟ್ ಅವರ ಮಾಹಿತಿ ಕದಿಯಲೆಂದೇ ಸಿದ್ಧಪಡಿಸಲಾಗಿತ್ತು.
ಸನ್ನಿವೇಶ 4. UPI ಮತ್ತು ಡಿಜಿಟಲ್ ಪಾವತಿ ವಂಚನೆಗಳು: ಇದರಲ್ಲಿ ವಂಚಕರು ತಮ್ಮ ಸ್ವಂತ UPI QR ಕೋಡ್ ಅಥವಾ ಲಿಂಕ್ ಕಳುಹಿಸಿ, ಇದು ವಿಮೆ ಕಂಪನಿಯ ಪಾವತಿ ಲಿಂಕ್ ಎಂದು ಸುಳ್ಳು ಹೇಳುತ್ತಾರೆ. ಅವರು ಬಲಿಪಶುಗಳನ್ನು ತಮ್ಮ ವೈಯಕ್ತಿಕ ಖಾತೆಗಳಿಗೆ ಹಣವನ್ನು ವರ್ಗಾಯಿಸುವಂತೆ ಮೋಸಗೊಳಿಸುತ್ತಾರೆ, ಇದು ವಿಮಾ ಪಾವತಿಗಳು ಅಥವಾ ರಿಯಾಯಿತಿಗಳ ಸೋಗಿನಲ್ಲಿ ಅನಧಿಕೃತ ಹಣ ವರ್ಗಾವಣೆಗೆ ಕಾರಣವಾಗುತ್ತದೆ.
ಸುಚೇತಾ ಅವರಿಗೆ ಒಬ್ಬ ವ್ಯಕ್ತಿ ಕರೆ ಮಾಡಿ, ತಾನು ವಿಮೆ ಏಜೆಂಟ್ ಎಂದು ಹೇಳಿಕೊಳ್ಳುತ್ತಾನೆ. “ಪಾಲಿಸಿ ನವೀಕರಣದ ಮೇಲೆ ಕಡಿಮೆ ಸಮಯದ ಡಿಸ್ಕೌಂಟ್ ಇದೆ” ಎಂದು ಹೇಳಿ, ಒಂದು UPI ಲಿಂಕ್ ಕಳುಹಿಸುತ್ತಾನೆ. ಅದು ನಿಜ ಎಂದು ನಂಬಿದ ಸುಚೇತಾ, ಲಿಂಕ್ ಕ್ಲಿಕ್ ಮಾಡಿ ತಮ್ಮ UPI ಪಿನ್ ಹಾಕುತ್ತಾರೆ. ತಕ್ಷಣ ಅವರ ಖಾತೆಯಿಂದ ಹಣ ಕಡಿತವಾಗುತ್ತದೆ, ಆದರೆ ವಿಮೆ ಕಂಪನಿಗೆ ಆ ಹಣ ತಲುಪುವುದೇ ಇಲ್ಲ.
ವಿಮೆ ವಂಚನೆಯನ್ನು ಗುರುತಿಸುವುದು ಹೇಗೆ?
- ನಂಬಲಸಾಧ್ಯವಾದ ಆಫರ್‌ಗಳು, ಅಂದರೆ ತೀರಾ ಕಡಿಮೆ ಪ್ರೀಮಿಯಂ ಅಥವಾ ದೊಡ್ಡ ಲಾಭದ ಭರವಸೆ.
- “ಈಗಲೇ ಮಾಡಿ, ಇಲ್ಲದಿದ್ದರೆ ಆಫರ್ ಮುಗಿಯುತ್ತದೆ” ಅಥವಾ “ಪಾಲಿಸಿ ರದ್ದಾಗುತ್ತದೆ” ಎಂಬಂತಹ ಒತ್ತಡದ ತಂತ್ರಗಳು.
- UPI ಅಥವಾ ವೈಯಕ್ತಿಕ ಖಾತೆಗಳಿಗೆ ಹಣ ಹಾಕಲು ಕೇಳುವುದು (ಅಧಿಕೃತವಲ್ಲದ ವಿಧಾನಗಳು).
- ವೆಬ್‌ಸೈಟ್ ಸುರಕ್ಷಿತವಾಗಿಲ್ಲದಿರುವುದು (ಉದಾಹರಣೆಗೆ, HTTPS ಇಲ್ಲದಿರುವುದು ಅಥವಾ ಸರಿಯಾದ ಸಂಪರ್ಕ ವಿವರಗಳು ಇಲ್ಲದಿರುವುದು).
- OTP, UPI ಪಿನ್ ಅಥವಾ ಖಾತೆ ವಿವರಗಳಂತಹ ರಹಸ್ಯ ಮಾಹಿತಿಯನ್ನು ಕೇಳುವುದು.
- ನೀವು ಕೇಳದಿದ್ದರೂ ಕರೆ, ಇಮೇಲ್ ಅಥವಾ ಮೆಸೇಜ್ ಮಾಡಿ ವೈಯಕ್ತಿಕ ಮಾಹಿತಿ ಕೇಳುವುದು.
ವಿಮೆ ವಂಚನೆಯಿಂದ ನಿಮ್ಮನ್ನು ರಕ್ಷಿಸಿಕೊಳ್ಳುವುದು ಹೇಗೆ?
- ವಿಮೆ ಕಂಪನಿಯನ್ನು ಪರಿಶೀಲಿಸಿ: ಕಂಪನಿಯ ಇತಿಹಾಸ, ಆರ್ಥಿಕ ಸ್ಥಿತಿ, ಪರವಾನಗಿ ಮತ್ತು ಗ್ರಾಹಕರ ವಿಮರ್ಶೆಗಳನ್ನು (ರಿವ್ಯೂಸ್) ಪರಿಶೀಲಿಸಿ.
- ನಗದು ಪಾವತಿಯನ್ನು ತಪ್ಪಿಸಿ: ಆನ್‌ಲೈನ್ ಪೋರ್ಟಲ್ ಅಥವಾ ಕಾರ್ಡ್ ಮೂಲಕವೇ ಹಣ ಪಾವತಿಸಿ. ಇದರಿಂದ ನಿಮ್ಮ ಪಾವತಿಗೆ ಸೂಕ್ತ ದಾಖಲೆ ಇರುತ್ತದೆ.
- ಮಾಹಿತಿಯನ್ನು ರಕ್ಷಿಸಿ: ನಿಮ್ಮ ವೈಯಕ್ತಿಕ ಮಾಹಿತಿಯನ್ನು ನಂಬಲರ್ಹ ಮೂಲಗಳೊಂದಿಗೆ ಮತ್ತು ಸುರಕ್ಷಿತ ಮಾರ್ಗಗಳಲ್ಲಿ ಮಾತ್ರ ಹಂಚಿಕೊಳ್ಳಿ.
- ಪಾಲಿಸಿ ವಿವರಗಳನ್ನು ಓದಿ: ಪಾಲಿಸಿ ಅಸಲಿಯೇ ಎಂದು ತಿಳಿಯಲು, ಪಾಲಿಸಿ ದಾಖಲೆಯ ನಿಯಮಗಳನ್ನು ಸರಿಯಾಗಿ ಓದಿಕೊಳ್ಳಿ.
ನೀವು ವಿಮೆ ವಂಚನೆಗೆ ಒಳಗಾದರೆ ಏನು ಮಾಡಬೇಕು?
ನಿಮಗೆ ವಂಚನೆಯಾಗಿದೆ ಎಂದು ಅನುಮಾನ ಬಂದರೆ, ಅಥವಾ ಮೋಸ ಹೋಗಿದ್ದರೆ, ತಕ್ಷಣವೇ ಈ ಕ್ರಮಗಳನ್ನು ಕೈಗೊಳ್ಳಿ:
- ದೂರು ನೀಡಿ:
- PhonePe ಆ್ಯಪ್‌: ‘ಸಹಾಯ’ ವಿಭಾಗಕ್ಕೆ ಹೋಗಿ ದೂರು ನೀಡಿ.
- ಗ್ರಾಹಕ ಸೇವೆ: PhonePe ಗ್ರಾಹಕ ಸೇವೆಗೆ ಕರೆ ಮಾಡಿ: 80–68727374 ಅಥವಾ 022–68727374.
- ಸೋಷಿಯಲ್ ಮೀಡಿಯಾ: ಅಧಿಕೃತ PhonePe ಖಾತೆಗಳಲ್ಲಿ ವರದಿ ಮಾಡಿ:
- Twitter: PhonePe Support
- Facebook: PhonePe Facebook
- ಕುಂದುಕೊರತೆ ಪರಿಹಾರ: ನಿಮ್ಮ ಟಿಕೆಟ್ ಐಡಿ (Ticket ID) ಬಳಸಿ PhonePe ಪೋರ್ಟಲ್‌ನಲ್ಲಿ ದೂರು ನೀಡಿ: ಕುಂದುಕೊರತೆ ಪೋರ್ಟಲ್
- ಅಧಿಕಾರಿಗಳಿಗೆ ವರದಿ ಮಾಡಿ:
- ಸೈಬರ್ ಕ್ರೈಮ್ ಸೆಲ್: ಸೈಬರ್ ಕ್ರೈಮ್ ಪೋರ್ಟಲ್‌ನಲ್ಲಿ ದೂರು ದಾಖಲಿಸಿ ಅಥವಾ 1930 ಗೆ ಕರೆ ಮಾಡಿ.
- IRDAI: ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರಕ್ಕೆ (IRDAI) ವಂಚನೆಯ ಬಗ್ಗೆ ವರದಿ ಮಾಡಿ: IRDAI ಸಂಪರ್ಕ.
ಪ್ರಮುಖ ಸೂಚನೆ — PhonePe ಎಂದಿಗೂ ನಿಮ್ಮ ಗೌಪ್ಯ ಅಥವಾ ವೈಯಕ್ತಿಕ ವಿವರಗಳನ್ನು ಕೇಳುವುದಿಲ್ಲ. PhonePe ಹೆಸರಿನಲ್ಲಿ ಬರುವ ಇಮೇಲ್‌ಗಳು ‘phonepe.com’ ಡೊಮೇನ್‌ನಿಂದ ಬಂದಿಲ್ಲದಿದ್ದರೆ, ಅವುಗಳನ್ನು ನಿರ್ಲಕ್ಷಿಸಿ. ನಿಮಗೆ ವಂಚನೆಯ ಅನುಮಾನ ಬಂದರೆ, ತಕ್ಷಣವೇ ಅಧಿಕಾರಿಗಳನ್ನು ಸಂಪರ್ಕಿಸಿ.
