ഡിജിറ്റൽ പണം വാങ്ങി പകരം പണം നൽകുന്ന തട്ടിപ്പ്: കൈയിലെ പണത്തിന് പകരമായി UPI പണം എന്തുകൊണ്ട് സ്വീകരിക്കരുത്?

നിങ്ങൾ ഒരു കട നടത്തുന്ന വ്യാപാരിയാണെങ്കിൽ, ചില്ലറ ചോദിച്ച് വരുന്ന ആളുകൾ നിങ്ങൾക്ക് അപരിചിതരായിരിക്കില്ല. എന്നാൽ ഡിജിറ്റൽ പണമിടപാടുകളുടെ ഈ കാലഘട്ടത്തിൽ ഈ ശീലം തികച്ചും വ്യത്യസ്തമായ ഒരു രൂപം കൈവരിച്ചിരിക്കുന്നു. ആളുകൾക്ക് ചില്ലറ ആവശ്യമായിരിക്കില്ല, പകരം ഡിജിറ്റൽ പണത്തിന് പകരമായി നിങ്ങളുടെ കൈയിൽ നിന്ന് നേരിട്ട് പണം വാങ്ങാനായിരിക്കും അവർ വരുന്നത്. ഒറ്റനോട്ടത്തിൽ ഇത് നിരുപദ്രവകരമായി  തോന്നാമെങ്കിലും, പെട്ടെന്ന് പണമുണ്ടാക്കാൻ തട്ടിപ്പുകാർ നിങ്ങളുടെ സത്യസന്ധതയെ ചൂഷണം ചെയ്യും.

തട്ടിപ്പുകാർ എങ്ങനെയാണ് ഈ തട്ടിപ്പ് നടത്തുന്നതെന്നും ഇതിൽ നിന്ന് സുരക്ഷിതരായിരിക്കാൻ നിങ്ങൾക്ക് എന്ത് ചെയ്യാമെന്നും ഈ ബ്ലോഗിലൂടെ വ്യക്തമായി മനസ്സിലാക്കാം.

നിങ്ങളുടെ ബിസിനസ്സിനായുള്ള UPI

ഈ ഡിജിറ്റൽ-ടു-ഫിസിക്കൽ ക്യാഷ് തട്ടിപ്പ് എങ്ങനെയാണ് പ്രവർത്തിക്കുന്നതെന്ന് നോക്കുന്നതിന് മുൻപ്, PhonePe-യുടെ വ്യാപാരികൾക്കായുള്ള ഡിജിറ്റൽ പേയ്‌മെൻ്റ് സംവിധാനമായ PhonePe Business-നെക്കുറിച്ച് നമുക്കൊന്ന് മനസ്സിലാക്കാം.

ഡിജിറ്റൽ പണമിടപാടുകൾ വരുന്നതിന് മുൻപ് തന്നെ നിങ്ങൾ കട നടത്തുന്നുണ്ടെങ്കിൽ, നേരിട്ടുള്ള പണമിടപാടുകളിൽ നിന്ന് ഡിജിറ്റലിലേക്ക് മാറിയ വിപ്ലവം നിങ്ങൾ നേരിട്ട് കണ്ടിട്ടുണ്ടാകും. ഒരു കപ്പ് ചായയുടെ ചെറിയ തുക മുതൽ വലിയ റീട്ടെയിൽ ബില്ലുകൾ വരെ വാങ്ങാൻ UPI QR കോഡുകൾ ഇന്ന് കാര്യങ്ങൾ എളുപ്പമാക്കി.

സേവനങ്ങൾക്കോ സാധനങ്ങൾക്കോ പകരമായി ഉപഭോക്താക്കളിൽ നിന്ന് പണം സ്വീകരിക്കുന്നതിനായി PhonePe വ്യാപാരികൾക്ക് പ്രത്യേക QR കോഡുകൾ നൽകുന്നു. അംഗീകൃത ബിസിനസ്സ് സേവനങ്ങൾക്ക് മാത്രമേ ഇത് ഉപയോഗിക്കാവൂ എന്നത് ശ്രദ്ധിക്കേണ്ടതാണ്. എന്നിരുന്നാലും, നേരിട്ട് പണം നൽകുന്നതിന് പകരമായി QR വഴി പണം സ്വീകരിക്കുന്നത് വർധിക്കുന്നതായി ഞങ്ങൾ കണ്ടിട്ടുണ്ട്. ഡിജിറ്റൽ പണത്തെ ഫിസിക്കൽ പണമാക്കി മാറ്റുന്നതിനായി QR ഉപയോഗിക്കുന്ന ഈ രീതിയെ QR ഫോർ ATM സർവീസസ് എന്ന് വിളിക്കുന്നു.

ഒരു വ്യാപാരിയെന്ന നിലയിൽ, അനുകമ്പ കൊണ്ടോ ബിസിനസ്സ് താല്പര്യങ്ങൾ കൊണ്ടോ ആയിരിക്കാം നിങ്ങൾ ഇത് ചെയ്യുന്നത്. എന്നാൽ ഇത്തരം പ്രവർത്തനങ്ങളിൽ നിരവധി അപകടസാധ്യതകൾ അടങ്ങിയിട്ടുണ്ട്. QR കോഡുകൾ വഴി പണം സ്വീകരിക്കുന്നത് വേഗതയേറിയതും സുരക്ഷിതവുമാണെന്ന് തോന്നാമെങ്കിലും, വ്യാപാരികളുടെ അക്കൗണ്ടുകൾ ഇത്തരം കാര്യങ്ങൾക്കായി ദുരുപയോഗം ചെയ്യുന്നത് ബാങ്ക് അക്കൗണ്ടുകൾ മരവിപ്പിക്കുന്നതിനും, സാമ്പത്തിക നഷ്ടത്തിനും, ഗുരുതരമായ നിയമനടപടികൾക്കും കാരണമായേക്കാം.

എങ്ങനെയാണ് ഡിജിറ്റൽ പണത്തിന് പകരം നേരിട്ട് പണം നൽകുന്ന തട്ടിപ്പ് നടക്കുന്നത്?

ഒരു ഉപഭോക്താവ് നിങ്ങളുടെ കടയിലേക്ക് വരുന്നു. അയാൾ വളരെ പരിഭ്രാന്തനാണെന്ന് നടിക്കുകയും, ഉടൻ തന്നെ ₹5,000 ആവശ്യമുണ്ടെന്ന് പറയുകയും ചെയ്യുന്നു. നേരിട്ട് പണം നൽകിയാൽ പകരം അയാൾ ആ തുക നിങ്ങളുടെ അക്കൗണ്ടിലേക്ക് UPI വഴി ട്രാൻസ്ഫർ ചെയ്യാമെന്ന് പറയുന്നു. സഹായിക്കുകയാണെങ്കിൽ നിങ്ങൾക്ക് ചെറിയൊരു “കമ്മീഷൻ” നൽകാമെന്നും അയാൾ സമ്മതിക്കുന്നു. ഒരു നല്ല വ്യക്തിയെന്ന നിലയിലും, ബാങ്കിൽ പോയി പണം നിക്ഷേപിക്കുന്ന സമയം ലാഭിക്കാമല്ലോ എന്ന് കരുതിയും നിങ്ങൾ അയാൾ ചോദിക്കുന്ന പണം നൽകാൻ തീരുമാനിക്കുന്നു.

ഈ സാഹചര്യം തട്ടിപ്പുകാരൻ എങ്ങനെയാണ് അയാൾക്ക് അനുകൂലമായി ഉപയോഗിക്കുന്നത്:

സാഹചര്യം 1: ₹5,000 ട്രാൻസ്ഫർ ചെയ്യാനായി തട്ടിപ്പുകാരൻ ഒരു വ്യാജ പേയ്‌മെൻ്റ് ആപ്പ് ഉപയോഗിക്കുന്നു. പണം അയച്ചതിൻ്റെ ഒരു വ്യാജ പേയ്‌മെൻ്റ് കൺഫർമേഷൻ സ്‌ക്രീൻ  നിങ്ങളെ കാണിക്കുകയും, പകരം വേഗത്തിൽ പണം നൽകാൻ നിർബന്ധിക്കുകയും ചെയ്യുന്നു. പിന്നീട് അക്കൗണ്ട് പരിശോധിക്കുമ്പോഴാണ് പണം വന്നിട്ടില്ലെന്നും നിങ്ങൾ കബളിപ്പിക്കപ്പെട്ടുവെന്നും മനസ്സിലാക്കുന്നത്.

സാഹചര്യം 2: തട്ടിപ്പുകാരൻ ഇടപാട് പൂർത്തിയാക്കുന്നു, അതായത് UPI വഴി ₹5,000 അയക്കുകയും നിങ്ങളിൽ നിന്ന് നേരിട്ട് പണം വാങ്ങുകയും ചെയ്യുന്നു. പണം നൽകിയതിന് നിങ്ങളുടെ കൈവശം ഡിജിറ്റൽ തെളിവുകൾ ഇല്ലാത്തതിനാൽ, തട്ടിപ്പുകാരൻ ഒരു ചാർജ്ബാക്ക്  ഉന്നയിച്ചേക്കാം. തെളിവുകൾ സമർപ്പിക്കേണ്ട ഈ ചാർജ്ബാക്ക് അന്വേഷണം പൂർത്തിയാകുന്നതുവരെ, നിങ്ങളുടെ അക്കൗണ്ട് മരവിപ്പിക്കുകയോ നിയന്ത്രണങ്ങൾ ഏർപ്പെടുത്തുകയോ ചെയ്തേക്കാം. ഇത് നിങ്ങൾക്ക് നേരിട്ടുള്ള ബിസിനസ്സ് നഷ്ടത്തിനും സാമ്പത്തിക നഷ്ടത്തിനും കാരണമാകും.

സാഹചര്യം 3: തട്ടിപ്പുകാരൻ മോഷ്ടിച്ച ക്രെഡിറ്റ് കാർഡോ, ഹാക്ക് ചെയ്ത UPI-ലെ RuPay അക്കൗണ്ടോ, അല്ലെങ്കിൽ സൈബർ കുറ്റകൃത്യത്തിലൂടെ ഇരയാക്കപ്പെട്ട മറ്റൊരാളുടെ പണമോ ഉപയോഗിച്ചാണ് ആ QR ട്രാൻസ്ഫർ നടത്തിയതെങ്കിൽ, നിങ്ങളുടെ മർച്ചൻ്റ് അക്കൗണ്ട് കള്ളപ്പണം വെളുപ്പിക്കലുമായി ബന്ധിപ്പിക്കപ്പെടും. കേന്ദ്ര ആഭ്യന്തര മന്ത്രാലയത്തിൻ്റെയും മറ്റ് റഗുലേറ്ററി അതോറിറ്റികളുടെയും മാർഗ്ഗനിർദ്ദേശങ്ങൾ അനുസരിച്ച്, നിങ്ങൾ സഹായിച്ച ആ ഉപഭോക്താവ് 1930 എന്ന സൈബർ ക്രൈം ഹെൽപ്പ് ലൈനിൽ വിളിച്ച് പരാതി നൽകിയാൽ,  RBI, MHA നിയമപ്രകാരം പോലീസ് അന്വേഷണം നടത്തുകയും അന്വേഷണ ഘട്ടത്തിൽ നിങ്ങളുടെ മർച്ചൻ്റ് അക്കൗണ്ട് മരവിപ്പിക്കുകയും ചെയ്തേക്കാം. അറിയാതെയാണെങ്കിലും നിങ്ങൾ ഒരു വലിയ തട്ടിപ്പിൻ്റെ ഭാഗമാകുകയും ആഴ്ചകളോളമോ മാസങ്ങളോളമോ നിങ്ങളുടെ ബിസിനസ്സ് തടസ്സപ്പെടുകയും ചെയ്യാം.

ചില ലളിതമായ ശീലങ്ങൾ പിന്തുടർന്നാൽ ഈ മൂന്ന് സാഹചര്യങ്ങളും ഒഴിവാക്കാം എന്നതാണ് ഇതിലെ ആശ്വാസകരമായ കാര്യം.

ഡിജിറ്റൽ പണത്തിന് പകരം നേരിട്ട് പണം നൽകുന്ന തട്ടിപ്പുകൾ എങ്ങനെ ഒഴിവാക്കാം?

നിങ്ങളുടെ ബിസിനസ്സ് പ്രവർത്തനങ്ങൾ സുരക്ഷിതവും സുസ്ഥിരവുമായി തുടരുന്നുവെന്ന് ഉറപ്പാക്കാൻ, നിങ്ങൾ RBI മാർഗ്ഗനിർദ്ദേശങ്ങളും പാലിക്കേണ്ടതുണ്ട്. താഴെ പറയുന്ന കാര്യങ്ങൾ ബിസിനസ്സ് സുഗമമായി കൊണ്ടുപോകാൻ നിങ്ങളെ സഹായിക്കും:

1. ബിസിനസ്സ് ഇടപാടുകൾ ബിസിനസ്സിന് മാത്രമായി ചുരുക്കുക

നിങ്ങളുടെ മർച്ചന്റ് അക്കൗണ്ട് നിങ്ങളുടെ ബിസിനസ്സ് ആവശ്യങ്ങൾക്കായി മാത്രം രൂപകൽപ്പന ചെയ്തിട്ടുള്ളതാണ്. നിങ്ങൾ നൽകുന്ന സാധനങ്ങൾക്കോ സേവനങ്ങൾക്കോ പകരമായി മാത്രം പണം സ്വീകരിക്കാൻ ഇത് ഉപയോഗിക്കുക.

• ക്യാഷ് ഔട്ടുകൾ ഒഴിവാക്കുക: ഒരു വ്യാപാരിയെന്ന നിലയിൽ, യഥാർത്ഥ വിൽപ്പനകൾക്കല്ലാതെ മറ്റ് കാര്യങ്ങൾക്കൊന്നും നിങ്ങളുടെ ബിസിനസ്സ് അക്കൗണ്ട് വഴി പണം സ്വീകരിക്കാനോ അയക്കാനോ പാടില്ല.
• നിങ്ങളുടെ ജീവനക്കാരെ ബോധവൽക്കരിക്കുക: ബിസിനസ്സ് ആവശ്യങ്ങൾക്ക് മാത്രം പണം സ്വീകരിക്കാൻ ജീവനക്കാർക്ക് നിർദ്ദേശം നൽകുക.
• സുതാര്യത നിലനിർത്തുക: അനാവശ്യ തർക്കങ്ങളിൽ നിന്ന് ഒഴിവാകാൻ ഓരോ ഇടപാടുകളും സുതാര്യമാണെന്ന് ഉറപ്പാക്കുക.

2. ATM സേവനങ്ങളും പണം കൈമാറലും ഒഴിവാക്കുക

വ്യാപാരികൾ ATM സംബന്ധമായ സേവനങ്ങളോ പണം നേരിട്ട് കൈമാറുന്നതോ PhonePe പ്രോത്സാഹിപ്പിക്കുന്നില്ല.

• എന്തുകൊണ്ട്?: മർച്ചൻ്റ് അക്കൗണ്ടുകൾ വഴിയുള്ള പണം പിൻവലിക്കലുകളോ കൈമാറ്റങ്ങളോ റെഗുലേറ്ററി നിയമങ്ങളുടെ ലംഘനത്തിനും, ഇടപാടുകളുടെ കൃത്യത നഷ്ടപ്പെടുന്നതിനും കാരണമാകും.
• അനന്തരഫലങ്ങൾ: മർച്ചൻ്റ് പോളിസിയുടെ പരിധിയിൽ വരാത്ത ഇത്തരം കാര്യങ്ങളിൽ ഏർപ്പെടുന്നത് ഞങ്ങളുടെ പ്ലാറ്റ്‌ഫോമിൻ്റെ വിശ്വാസ്യതയെ ബാധിക്കും. അതിനാൽ, പോളിസി ലംഘനങ്ങൾ നിങ്ങളുടെ മർച്ചൻ്റ് അക്കൗണ്ട് താൽക്കാലികമായോ അല്ലെങ്കിൽ പൂർണ്ണമായോ സസ്പെൻഡ് ചെയ്യുന്നതിലേക്ക് നയിച്ചേക്കാം.

3. പേയ്‌മെൻ്റുകൾ നിങ്ങളുടെ സ്വന്തം ഉപകരണത്തിൽ മാത്രം പരിശോധിക്കുക

പണം അയച്ചതായി തെറ്റിദ്ധരിപ്പിക്കാൻ വ്യാജ സ്ക്രീൻഷോട്ടുകൾ കാണിച്ച് തട്ടിപ്പുകാർ നിങ്ങളെ കബളിപ്പിച്ചേക്കാം. ഇത്തരം തട്ടിപ്പുകളിൽ വീഴാതിരിക്കാൻ, പേയ്‌മെൻ്റ് എപ്പോഴും നിങ്ങളുടെ സ്വന്തം ഉപകരണത്തിൽ തന്നെ പരിശോധിച്ച് ഉറപ്പുവരുത്തുക. അവർ കാണിക്കുന്ന സ്ക്രീൻഷോട്ടുകളോ പോപ്പ്-അപ്പുകളോ വിശ്വസിക്കരുത്, നിങ്ങളുടെ സ്വന്തം PhonePe ആപ്പിൽ പരിശോധിക്കുകയോ അല്ലെങ്കിൽ ബാങ്കിൽ നിന്നുള്ള SMS വരുന്നതുവരെ കാത്തിരിക്കുകയോ ചെയ്യുക.

നിങ്ങൾ തട്ടിപ്പിനിരയായാൽ എന്ത് ചെയ്യണം?

നിങ്ങൾ ഏതെങ്കിലും തരത്തിലുള്ള തട്ടിപ്പിനിരയായെന്ന് സംശയം തോന്നിയാൽ, ഉടൻ തന്നെ റിപ്പോർട്ട് ചെയ്യുക. ഓരോ നിമിഷവും വിലപ്പെട്ടതാണ്.

PhonePe-യിൽ എങ്ങനെ റിപ്പോർട്ട് ചെയ്യാം:

• PhonePe Business ആപ്പ്: ഹെൽപ്പ് വിഭാഗത്തിലേക്ക് പോയി ഹെൽപ്പ് ബട്ടണിൽ ക്ലിക്ക് ചെയ്യുക.
• PhonePe കസ്റ്റമർ കെയർ: 080-68727374 / 022-68727374 എന്നീ നമ്പറുകളിൽ വിളിക്കുക
• ലോഗിൻ സംബന്ധമായ പ്രശ്നങ്ങൾ : https://support.phonepe.com/ വഴി ഒരു ടിക്കറ്റ് സമർപ്പിക്കുക.
• സോഷ്യൽ മീഡിയ:
  • Twitter: PhonePe Support
  • Facebook: PhonePe Official
• പരാതി പരിഹാരം: PhonePe-യുടെ പരാതി പരിഹാര പോർട്ടൽ വഴി പരാതി രജിസ്റ്റർ ചെയ്യാം

അധികൃതർക്ക് റിപ്പോർട്ട് ചെയ്യാൻ:

• സൈബ‍ർ ക്രൈം സെൽ: സൈബർ ക്രൈം പോർട്ടലിൽ പരാതി നൽകുകയോ 1930 എന്ന നമ്പറിൽ വിളിക്കുകയോ ചെയ്യുക
• ടെലികോം വകുപ്പ് (DOT): സംശയാസ്പദമായ കോളുകൾ, മെസേജുകൾ, WhatsApp/Telegram തട്ടിപ്പുകൾ എന്നിവ സഞ്ചാർ സാത്തി പോർട്ടലിലെ ചക്ഷു സൗകര്യം വഴി റിപ്പോർട്ട് ചെയ്യുക

പ്രത്യേകം ഓർമ്മിക്കുക — PhonePe ഒരിക്കലും നിങ്ങളുടെ രഹസ്യ വിവരങ്ങളോ വ്യക്തിപരമായ വിവരങ്ങളോ ആവശ്യപ്പെടില്ല. phonepe.com എന്ന ഡൊമൈനിൽ നിന്നല്ലാതെ വരുന്ന മെയിലുകൾ, അത് PhonePe-യിൽ നിന്നാണെന്ന് അവകാശപ്പെട്ടാൽ പോലും വിശ്വസിക്കരുത്. തട്ടിപ്പ് നടന്നതായി സംശയം തോന്നിയാൽ ഉടൻ തന്നെ അധികൃതരുമായി ബന്ധപ്പെടുക.