ഇൻഷുറൻസ് തട്ടിപ്പുകൾ: പണം നഷ്ടപ്പെടാതിരിക്കാൻ ശ്രദ്ധിക്കേണ്ട കാര്യങ്ങൾ

നിങ്ങൾ അവസാനമായി ഒരു ഇൻഷുറൻസ് പോളിസി വാങ്ങിയതോ അല്ലെങ്കിൽ പുതുക്കിയതോ ആയ സമയം ഒന്ന് ഓർത്തുനോക്കൂ. അത് ഹെൽത്ത് ഇൻഷുറൻസോ, ലൈഫ് ഇൻഷുറൻസോ, അല്ലെങ്കിൽ വാഹന ഇൻഷുറൻസോ ആകാം. അപ്രതീക്ഷിതമായ ഒരു സാമ്പത്തിക ബാധ്യത വരുമ്പോൾ അതൊരു കൈത്താങ്ങാവണം എന്ന ഉദ്ദേശത്തോടെയാണല്ലോ നമ്മൾ ഇൻഷുറൻസ് എടുക്കുന്നത്. എന്നാൽ, നിങ്ങൾക്ക് സുരക്ഷിതത്വം നൽകേണ്ട ഈ മാർഗം തന്നെ തട്ടിപ്പുകാർ നിങ്ങളെ കബളിപ്പിക്കാൻ ഉപയോഗിച്ചാലോ?

ഇൻഷുറൻസ് കമ്പനികൾക്ക് മാത്രമല്ല, പോളിസി ഉടമകൾക്കും വലിയ തലവേദനയാണ് ഇത്തരം തട്ടിപ്പുകൾ. വ്യാജ ക്ലെയിമുകൾ തടയാൻ ഇൻഷുറൻസ് കമ്പനികൾക്ക് അവരുടേതായ മാർഗങ്ങളുണ്ട്. എന്നാൽ, ഒരു ഉപഭോക്താവ് എന്ന നിലയിൽ നിങ്ങളെ ലക്ഷ്യമിട്ടും തട്ടിപ്പുകൾ നടക്കാം. അശ്രദ്ധമായിരുന്നാൽ നിങ്ങളുടെ കയ്യിലെ പണം നഷ്ടപ്പെടാൻ സാധ്യതയുണ്ട്.

ഇൻഷുറൻസ് മേഖലയിലെ പ്രധാന തട്ടിപ്പുകൾ ഏതെല്ലാമാണെന്നും, അവയിൽ നിന്ന് എങ്ങനെ സുരക്ഷിതരായിരിക്കാമെന്നും ഈ ബ്ലോഗ് വിവരിക്കുന്നു.

എന്താണ് ഇൻഷുറൻസ് തട്ടിപ്പ്?

കുറഞ്ഞ പ്രീമിയം, വമ്പൻ ഓഫറുകൾ എന്നിങ്ങനെ മോഹിപ്പിക്കുന്ന വാഗ്ദാനങ്ങൾ നൽകി, വ്യാജരേഖകളോ വെബ്സൈറ്റുകളോ ഉപയോഗിച്ച് ഉപഭോക്താക്കളിൽ നിന്ന് പണം തട്ടിയെടുക്കുന്ന രീതിയാണിത്. യഥാർത്ഥത്തിൽ ഇല്ലാത്ത പോളിസികൾക്കായും ഓഫറുകൾക്കായും ആളുകൾ പണം നൽകി വഞ്ചിക്കപ്പെടുന്നു.

പ്രധാനപ്പെട്ട തട്ടിപ്പ് രീതികൾ

1. വ്യാജ ഓഫറുകൾ: വിശ്വസിക്കാൻ പ്രയാസമുള്ളത്ര കുറഞ്ഞ പ്രീമിയം നിരക്കുകളോ, പ്രത്യേക ഡീലുകളോ വാഗ്ദാനം ചെയ്ത് തട്ടിപ്പുകാർ നിങ്ങളെ സമീപിക്കുന്നു. വ്യക്തിപരമായ വിവരങ്ങളും ബാങ്കിംഗ് വിവരങ്ങളും ചോർത്തുകയാണ് ഇവരുടെ ലക്ഷ്യം.

കാർ ഇൻഷുറൻസ് ഉടൻ പുതുക്കിയില്ലെങ്കിൽ പോളിസി ലാപ്‌സാകുമെന്ന് പറഞ്ഞ് രമ്യയ്ക്ക് ഒരു കോൾ ലഭിക്കുന്നു. ഒരു മണിക്കൂറിനുള്ളിൽ അവസാനിക്കുന്ന ഒരു പ്രത്യേക ഡിസ്‌കൗണ്ടും അവർ വാഗ്ദാനം ചെയ്യുന്നു. സമ്മർദ്ദത്തിലായ രമ്യ പോളിസി പുതുക്കാൻ തന്റെ ക്രെഡിറ്റ് കാർഡ് വിവരങ്ങൾ തിടുക്കത്തിൽ  കൈമാറുന്നു. പിന്നീട് അക്കൗണ്ട് പരിശോധിക്കുമ്പോഴാണ് വലിയൊരു തുക നഷ്ടപ്പെട്ടതായും താൻ കബളിപ്പിക്കപ്പെട്ടതായും രമ്യ തിരിച്ചറിയുന്നത്.

2. വ്യാജ ഇൻഷുറൻസ് വെബ്സൈറ്റുകൾ: യഥാർത്ഥ ഇൻഷുറൻസ് കമ്പനികളുടെ വെബ്സൈറ്റിന് സമാനമായ വ്യാജ സൈറ്റുകൾ സൈബർ ക്രിമിനലുകൾ നിർമ്മിക്കുന്നു. വ്യക്തിഗത വിവരങ്ങൾ, ബാങ്കിംഗ് വിശദാംശങ്ങൾ, അല്ലെങ്കിൽ നിലവിലില്ലാത്ത പോളിസികൾക്കുള്ള പേയ്‌മെന്റുകൾ എന്നിവ മോഷ്ടിക്കുക എന്നതാണ് ലക്ഷ്യം.

പ്രവാൽ തനിക്കും കുടുംബത്തിനുമായി ഒരു ഹെൽത്ത് ഇൻഷുറൻസ് വാങ്ങാൻ തീരുമാനിക്കുന്നു. “മികച്ച ഹെൽത്ത് ഇൻഷുറൻസ്” എന്ന് ഓൺലൈനിൽ സെർച്ച് ചെയ്തപ്പോൾ പ്രശസ്തമായ ഒരു കമ്പനിയുടേതെന്ന് തോന്നിക്കുന്ന ഒരു വെബ്സൈറ്റിൽ അയാൾ എത്തിച്ചേരുന്നു. എന്നാൽ ആ ഇൻഷുറൻസ് കമ്പനിയുടെ പേര് തെറ്റായി എഴുതിയതും, ലോഗോ പഴയതാണെന്നതും അയാൾ ശ്രദ്ധിച്ചില്ല. വ്യക്തിഗത, ബാങ്കിംഗ് വിവരങ്ങൾ നൽകി പണം അടച്ച ശേഷം കമ്പനിയുമായി ബന്ധപ്പെടാൻ ശ്രമിക്കുമ്പോഴാണ് അത് വ്യാജ വെബ്സൈറ്റായിരുന്നെന്നും പണം നഷ്ടപ്പെട്ടെന്നും പ്രവാൽ മനസ്സിലാക്കുന്നത്.

3. ഫിഷിംഗ് ഇമെയിലുകൾ: ഇൻഷുറൻസ് കമ്പനിയിൽ നിന്നെന്ന വ്യാജേന മെയിലുകൾ അയച്ച്, അതിലെ അപകടകരമായ ലിങ്കുകളിൽ ക്ലിക്ക് ചെയ്യിപ്പിച്ച് ഹാനികരമായ സോഫ്റ്റ്‌വെയറുകൾ ഇൻസ്റ്റാൾ ചെയ്ത്, നിങ്ങളുടെ വിവരങ്ങൾ ചോർത്തുന്ന രീതിയാണിത്.

സുശാന്തിന്റെ ഇൻഷുറൻസ് പോളിസി റദ്ദാകാതിരിക്കാൻ ഉടൻ തന്നെ അക്കൗണ്ട് വിവരങ്ങൾ വെരിഫൈ ചെയ്യണമെന്ന് കാണിച്ച് ഒരു മെയിൽ വരുന്നു. ഇൻഷുറൻസ് കമ്പനിയുടെ ഒറിജിനൽ വെബ്സൈറ്റ് പോലെ തോന്നിക്കുന്ന ഒരു ലിങ്കും അതിലുണ്ടായിരുന്നു. ഇമെയിലിൽ വിശ്വസിച്ച്, അവർ സ‍ൃഷ്ടിച്ച അടിയന്തര സാഹചര്യത്തിന് വഴങ്ങി, സുശാന്ത് ലിങ്കിൽ ക്ലിക്ക് ചെയ്ത് തന്റെ ലോഗിൻ വിവരങ്ങൾ  നൽകുന്നു. ആ വ്യാജ വെബ്സൈറ്റ് വഴി തട്ടിപ്പുകാർ തൻ്റെ വിവരങ്ങൾ ചോർത്തിയെന്നും ബാങ്ക് അക്കൗണ്ടിൽ നിന്ന് പണം പിൻവലിക്കുകയും ചെയ്തുവെന്ന് സുശാന്ത് മനസ്സിലാക്കുന്നു.

4. UPI, ഡിജിറ്റൽ പേയ്‌മെന്റ് തട്ടിപ്പുകൾ: ഇൻഷുറൻസ് കമ്പനിയുടെ ഔദ്യോഗിക പേയ്‌മെന്റ് ലിങ്കുകൾ എന്ന വ്യാജേന, തട്ടിപ്പുകാർ അവരുടെ സ്വന്തം UPI ലിങ്കുകളോ QR കോഡുകളോ അയച്ചു നൽകുന്നതാണ് ഈ തട്ടിപ്പിന്റെ രീതി. ഇൻഷുറൻസ് പേയ്മെന്റ് അടയ്ക്കാനോ ഡിസ്കൗണ്ട് നേടാനോ എന്ന പേരിൽ ഉപഭോക്താക്കളെ തെറ്റിദ്ധരിപ്പിച്ച്, തട്ടിപ്പുകാർ അവരുടെ വ്യക്തിപരമായ അക്കൗണ്ടുകളിലേക്ക് പണം അയപ്പിക്കുന്നു.

തൻ്റെ ഇൻഷുറൻസ് പോളിസി പുതുക്കുമ്പോൾ പരിമിത കാലത്തേക്ക് വലിയൊരു ഡിസ്കൗണ്ട് ഉണ്ടെന്ന് പറഞ്ഞ്, ഇൻഷുറൻസ് ഏജന്റാണെന്ന വ്യാജേന സുചേതയ്ക്ക് ഒരു കോൾ വരുന്നു. ഓഫർ ലഭിക്കാൻ അവർ അയച്ചുതരുന്ന UPI ലിങ്ക് വഴി പണം അടയ്ക്കാൻ ആവശ്യപ്പെടുന്നു. ഇത് യഥാർത്ഥമാണെന്ന് വിശ്വസിച്ച് സുചേത ലിങ്കിൽ ക്ലിക്ക് ചെയ്ത് UPI PIN നൽകുന്നു. പണം അക്കൗണ്ടിൽ നിന്ന് പോയെങ്കിലും, ഇൻഷുറൻസ് കമ്പനിയിൽ അന്വേഷിച്ചപ്പോൾ അങ്ങനെയൊരു ഇടപാട് നടന്നിട്ടില്ലെന്ന് സുചേത തിരിച്ചറിയുന്നു.

തട്ടിപ്പ് തിരിച്ചറിയാനുള്ള ലക്ഷണങ്ങൾ

• വിശ്വസിക്കാൻ കഴിയാത്തത്ര കുറഞ്ഞ പ്രീമിയം നിരക്കുകളോ വലിയ ആനുകൂല്യങ്ങളോ വാഗ്ദാനം ചെയ്യുക.
• “ഓഫർ ഉടൻ അവസാനിക്കും”, പോളിസി ഇപ്പോൾ തന്നെ ലാപ്സാകും എന്ന് പറഞ്ഞ് സമ്മർദ്ദത്തിലാക്കുക.
• കമ്പനിയുടെ അക്കൗണ്ടിലല്ലാതെ, വ്യക്തിപരമായ UPI ഐഡിയിലേക്കോ ബാങ്ക് അക്കൗണ്ടിലേക്കോ പണം അയക്കാൻ ആവശ്യപ്പെടുക.
• വെബ്സൈറ്റുകളിൽ സുരക്ഷാ മാനദണ്ഡങ്ങൾ (ഉദാഹരണത്തിന് HTTPS) ഇല്ലാതിരിക്കുക, കോൺടാക്റ്റ് വിവരങ്ങൾ ഇല്ലാതിരിക്കുക.
• OTP, UPI PIN, പാസ്‌വേഡുകൾ എന്നിവ ചോദിക്കുക.
• ആവശ്യപ്പെടാതെ തന്നെ പേഴ്സണൽ വിവരങ്ങൾ ചോദിച്ചുകൊണ്ട് കോൾ അല്ലെങ്കിൽ മെസേജ് വരിക.

എങ്ങനെ സുരക്ഷിതരായിരിക്കാം?

1. കമ്പനിയെക്കുറിച്ച് അന്വേഷിക്കുക: ഇൻഷുറൻസ് കമ്പനിയുടെ ചരിത്രം, ലൈസൻസ്, സാമ്പത്തിക സ്ഥിതി, കസ്റ്റമർ റിവ്യൂകൾ എന്നിവ പരിശോധിക്കുക.
2. പേയ്മെന്റ് രീതികൾ: വ്യക്തികളുടെ അക്കൗണ്ടിലേക്ക് പണം അയക്കാതെ, കമ്പനിയുടെ ഔദ്യോഗിക വെബ്സൈറ്റ് വഴിയോ ആപ്പ് വഴിയോ മാത്രം പണമടയ്ക്കുക.
3. വിവരങ്ങൾ സുരക്ഷിതമാക്കുക: വിശ്വസനീയമായ ഉറവിടങ്ങളിൽ മാത്രമേ നിങ്ങളുടെ വ്യക്തിപരമായ വിവരങ്ങൾ പങ്കുവയ്ക്കാവൂ.
4. പോളിസി വിവരങ്ങൾ വായിക്കുക: പോളിസി ഡോക്യുമെന്റിലെ നിബന്ധനകളും വ്യവസ്ഥകളും കൃത്യമായി വായിച്ചു മനസ്സിലാക്കുക.

തട്ടിപ്പിന് ഇരയായാൽ എന്തുചെയ്യണം?

നിങ്ങൾ വഞ്ചിക്കപ്പെട്ടതായി സംശയം തോന്നിയാൽ ഒട്ടും സമയം കളയാതെ പ്രതികരിക്കുക:

1. പരാതി നൽകുക:
   • PhonePe ആപ്പ്: ആപ്പിലെ ‘Help'(സഹായം) എന്ന വിഭാഗത്തിൽ പോയി പരാതി നൽകുക.
   • കസ്റ്റമർ കെയർ: PhonePe-യുമായി ബന്ധപ്പെടാൻ 80–68727374 അല്ലെങ്കിൽ 022–68727374 എന്നീ നമ്പറുകൾ ഉപയോഗിക്കുക.
2. സമൂഹമാധ്യമങ്ങൾ: PhonePe-യുടെ ഔദ്യോഗിക പേജുകളിൽ വിവരം അറിയിക്കുക:
   • Twitter: PhonePe Support
   • Facebook: PhonePe Facebook
3. പരാതി പരിഹാരം: ടിക്കറ്റ് ഐഡി ലഭിച്ച ശേഷം PhonePe-യുടെ പരാതി പരിഹാര പോർട്ടൽ വഴി പരാതി നൽകാം.
4. അധികാരികളെ അറിയിക്കുക:
   • Cyber Crime Cell: സൈബർ ക്രൈം പോർട്ടലിൽ പരാതി നൽകുകയോ 1930 എന്ന നമ്പറിൽ വിളിക്കുകയോ ചെയ്യുക.
   • IRDAI: ഇൻഷുറൻസ് റെഗുലേറ്ററി അതോറിറ്റി ഓഫ് ഇന്ത്യയുടെ പേജ് വഴി തട്ടിപ്പ് റിപ്പോർട്ട് ചെയ്യുക: IRDAIയെ ബന്ധപ്പെടുക

പ്രത്യേകം ഓർമ്മിക്കുക — PhonePe ഒരിക്കലും നിങ്ങളുടെ രഹസ്യ വിവരങ്ങളോ വ്യക്തിപരമായ വിവരങ്ങളോ ആവശ്യപ്പെടില്ല. phonepe.com എന്ന ഡൊമൈനിൽ നിന്നല്ലാതെ വരുന്ന മെയിലുകൾ, അത് PhonePe-യിൽ നിന്നാണെന്ന് അവകാശപ്പെട്ടാൽ പോലും വിശ്വസിക്കരുത്. തട്ടിപ്പ് നടന്നതായി സംശയം തോന്നിയാൽ ഉടൻ തന്നെ അധികൃതരുമായി ബന്ധപ്പെടുക.