RBI டிஜிட்டல் விழிப்புணர்வு வாரம்: சமூகப் பொறியியல் மோசடிகள் பற்றி நீங்கள் அறிய வேண்டியவை

உள்ளடக்கம் புதுப்பிக்கப்பட்டது: மார்ச் 12, 2026

சமூகப் பொறியியல் மோசடிகள் என்பது மக்களைத் தந்திரமாக ஏமாற்றும் ஒரு நுணுக்கமான முறையாகும். இதில் மோசடி செய்பவர்கள் உங்கள் பாஸ்வேர்டைத் திருடப் போராட வேண்டிய அவசியமோ அல்லது உங்கள் போனில் வைரஸை ஏற்றித் தகவல்களைத் திருட வேண்டிய தேவையோ (மால்வேர்) அவர்களுக்கு இல்லை. மாறாக, உங்களைப் பேச்சால் நம்ப வைத்து, உங்கள் ரகசிய நிதித் தகவல்களை நீங்களே முன்வந்து கொடுக்கும்படி தந்திரமாகச் செயல்படுவார்கள்.

மோசடி செய்பவர்கள் ஒருவித பதற்றமான சூழலை உருவாக்குவார்கள்; இதனால் பாதிக்கப்பட்டவர் நிலைமையை நிதானமாக யோசிக்க நேரமில்லாமல் போகிறது. ‘உங்கள் கணக்கு முடக்கப்பட்டுள்ளது’ அல்லது ‘உங்கள் சந்தா காலம் முடிவடையப் போகிறது’ என்பது போன்ற போலி SMS அல்லது மின்னஞ்சல்களை அனுப்பி, ஒரு பொய்யான அவசர நிலையை அவர்கள் ஏற்படுத்துகிறார்கள். நீங்கள் எதையும் யோசிக்காமல் உடனடியாகச் செயல்பட வேண்டும் என்பதே அவர்களின் நோக்கம்.

சமூகப் பொறியியல் மோசடிகள் குறித்து நீங்கள் தெரிந்து கொள்ள வேண்டிய அனைத்து விவரங்களையும், அவற்றிலிருந்து நீங்கள் எவ்வாறு பாதுகாப்பாக இருக்கலாம் என்பதையும் இந்த வலைப்பதிவு விரிவாக விளக்குகிறது.

சமூகப் பொறியியல் என்றால் என்ன?

சமூகப் பொறியியல் என்பது, உங்களை ஏமாற்றி உங்கள் தனிப்பட்ட தகவல்களைப் பெற்றுக்கொள்வதோ அல்லது உங்கள் பாதுகாப்பிற்குப் பங்கம் விளைவிப்பதோ ஆகும். மோசடிக்காரர்கள், உங்கள் மனதில் அச்சம், பேராசை அல்லது பரிதாப உணர்வை ஏற்படுத்துவதன் மூலமோ, அல்லது போலியான வாடிக்கையாளர் சேவைப் பிரதிநிதிகளாகப் பாசாங்கு செய்வதன் மூலமோ உங்களைத் தவறு செய்ய வைப்பார்கள். அவர்கள் வங்கிகள், அரசு அலுவலகங்கள் அல்லது உங்களுக்குத் தெரிந்தவர்கள் போல நடித்து உங்கள் நம்பிக்கையைப் பெறுவார்கள்; அதன் மூலம் உங்களை ஏமாற்றுவதே அவர்களின் நோக்கம்.

சமூகப் பொறியியல் மோசடிகளில் பொதுவாகப் பயன்படுத்தப்படும் உத்திகள்: மின்னஞ்சல்கள் அல்லது குறுஞ்செய்திகள் மூலம் தகவல்களைத் திருடும் பிஷிங், தொலைபேசி அழைப்புகள் மூலம் மக்களை வலைக்குள் விழ வைக்கும் விஷிங் அல்லது வாய்ஸ் பிஷிங், மற்றும் சட்ட அமலாக்க அதிகாரிகள் போல நடித்து மக்களைப் பயமுறுத்திப் பணம் பறிக்கும் “டிஜிட்டல் அரெஸ்ட்” ஆகியவை இதில் அடங்கும்.

சமூகப் பொறியியல் எவ்வாறு செயல்படுகிறது?

ஒரு பொதுவான சமூகப் பொறியியல் மோசடி எப்படி நடக்கும் என்பதற்கான உதாரணம் இதோ:

1. மோசடி செய்பவர் உங்களைத் தொடர்புகொண்டு, உங்கள் வங்கியின் வாடிக்கையாளர் சேவைப் பிரதிநிதி என்று அறிமுகப்படுத்திக் கொள்வார். உங்கள் கணக்கைச் சரிபார்க்க அழைப்பதாகக் கூறுவார். இது உடனடியாகச் செய்ய வேண்டிய ஒரு கட்டாயமான நடைமுறை என்றும், தவறினால் உங்கள் கணக்கில் உள்ள பணத்தை உங்களால் எடுக்க முடியாது என்றும் கூறி உங்களைப் பயமுறுத்துவார்.
2. நீங்கள் அதை நம்பியதும், உங்கள் டெபிட் கார்டு எண், PIN மற்றும் CVV போன்ற விவரங்களைக் கேட்கத் தொடங்குவர்.
3. இறுதியாக, அந்த போலி சரிபார்ப்பை முடிக்க உங்கள் மொபைலுக்கு வரும் OTP-ஐப் பகிருமாறு கேட்பர்.
4. உண்மையில், நீங்கள் அந்த OTP-ஐப் பகிர்ந்த அடுத்த நொடியே, அந்த மோசடி பேர்வழி இறுதித் திட்டத்தை நிறைவேற்றி உங்கள் கணக்கில் உள்ள பணம் முழுவதையும் காலி செய்துவிடுவர்.

தயவுசெய்து நினைவில் கொள்ளுங்கள்: வங்கியின் உண்மையான வாடிக்கையாளர் சேவைப் பிரதிநிதி ஒருபோதும் உங்கள் கிரெடிட்/டெபிட் கார்டு விவரங்களையோ அல்லது OTP-யையோ கேட்க மாட்டார்கள். அவர்கள் அங்கீகரிக்கப்பட்ட லேண்ட்லைன் எண்களில் இருந்து மட்டுமே உங்களைத் தொடர்புகொள்வார்கள்; தனிப்பட்ட மொபைல் எண்களில் இருந்து அழைக்க மாட்டார்கள். உங்கள் வங்கியின் அதிகாரப்பூர்வ இணையதள முகவரியிலிருந்து வராத மின்னஞ்சல்களை புறக்கணிக்க வேண்டும்.

சமூகப் பொறியியல் மோசடிகளில் இருந்து பாதுகாப்பாக இருப்பது எப்படி?

• SMS அல்லது பிற வழிகளில் உங்களுக்கு வரும் OTP-கள், PIN-கள் அல்லது வேறு எந்தக் குறியீடுகளையும் ஒருபோதும் பகிராதீர்கள். மேலும், பணத்தை அனுப்புவதற்கு மட்டுமே நீங்கள் PIN-ஐ உள்ளிட வேண்டும், பணத்தைப் பெறுவதற்கு அல்ல என்பதைக் கவனிப்பது மிகவும் அவசியமாகும். யாராவது ரீஃபண்ட் அல்லது கேஷ்பேக் பெறுவதற்கு உங்களை PIN-ஐ உள்ளிடச் சொன்னால், அது ஒரு மோசடியாகும்.
• உங்கள் கணக்கு எண் அல்லது கிரெடிட் மற்றும் டெபிட் கார்டு விவரங்களை ஒருபோதும் பொதுத் தளத்தில் பகிராதீர்கள். நீங்கள் சமூக வலைதளங்களில் ஒரு புகாரைப் பதிவு செய்கிறீர்கள் என்றால், உங்கள் தொலைபேசி எண் அல்லது தனிப்பட்ட விவரங்களைப் பதிவிட வேண்டாம்; ஏனெனில் இவை மோசடிக்காரர்களால் கண்காணிக்கப்படுகின்றன.
• வங்கியிலிருந்து அழைப்பதாகக் கூறிக்கொண்டு யாராவது தெரியாத எண்ணிலிருந்து உங்களை அழைத்து உங்கள் தனிப்பட்ட விவரங்களைக் கேட்டால், அந்த அழைப்பைத் துண்டித்துவிடுங்கள்.
• மின்னஞ்சல்களைப் பொறுத்தவரை, அனுப்புநரின் டொமைனைச் சரிபார்க்கவும். அது [XYZ]@gmail.com என்றோ அல்லது வேறு ஏதேனும் பொதுவான டொமைனாகவோ இருந்தால், அந்த மின்னஞ்சலைப் புறக்கணியுங்கள். வங்கியின் அனைத்து அதிகாரப்பூர்வத் தொடர்புகளும் பாதுகாப்பான டொமைன்களிலிருந்தே வரும்.
• உங்கள் திரையை ஒருபோதும் பகிராதீர்கள். எந்த ஒரு வங்கியோ அல்லது சேவை வழங்குநரோ உங்கள் திரையைப் பகிரவோ அல்லது ரிமோட் அக்சஸ் வழங்கவோ ஒரு செயலியை நிறுவுமாறு எப்போதும் கேட்க மாட்டார்கள்.
• எந்தவொரு சப்ஸ்கிரிப்ஷன் மேண்டேட் அல்லது ஆட்டோ-பே கோரிக்கையிலும் “Approve/அங்கீகரிக்கவும்” என்பதைக் கிளிக் செய்வதற்கு முன், வணிகரின் பெயர் மற்றும் தொகையைச் சரிபார்க்கவும். அந்தச் சேவையை நீங்களாகக் கோரவில்லை என்றால், அதை உடனடியாக நிராகரிக்கவும்.

பாதுகாப்பாகப் பரிவர்த்தனை செய்வது குறித்த காணொளியைப் பாருங்கள்: https://youtu.be/rHZ57O9X8kk

PhonePe-வில் புகாரளிக்க:

• PhonePe ஆப்: உதவி பகுதிக்குச் சென்று புகாரை எழுப்பவும்.
• PhonePe வாடிக்கையாளர் சேவை: PhonePe-ஐ 80–68727374 அல்லது 022–68727374 என்ற எண்ணில் அழைக்கவும்.
• சோஷியல் மீடியா புகாரளித்தல்:
  • Twitter: PhonePe Support
  • Facebook: PhonePe Official
• குறைதீர்க்கும் போர்ட்டல்: PhonePe குறைதீர்க்கும் போர்ட்டலில் புகார் பதிவு செய்யவும்.

அதிகாரிகளிடம் புகாரளித்தல்:

• சைபர் கிரைம் பிரிவு: சைபர் கிரைம் போர்ட்டலில் புகார் அளிக்கவும் அல்லது 1930 என்ற எண்ணை அழைக்கவும்.
• தொலைத்தொடர்புத் துறை (DOT): சஞ்சார் சாத்தி போர்ட்டலில் உள்ள சக்ஷு வசதி மூலம் சந்தேகத்திற்கிடமான செய்திகள், அழைப்புகள் அல்லது வாட்ஸ்அப்/டெலிகிராம் மோசடிகளைப் புகாரளிக்கவும்.

முக்கிய நினைவூட்டல் — PhonePe ஒருபோதும் இரகசியமான அல்லது தனிப்பட்ட விவரங்களைக் கேட்காது. Phonepe.com டொமைனிலிருந்து வராத மின்னஞ்சல்களைப் புறக்கணிக்கவும். நீங்கள் மோசடியைச் சந்தேகித்தால், உடனடியாக அதிகாரிகளைத் தொடர்புகொள்ளவும்.